روسی صدر ولادی میر پیوٹن کا مصری ہم منصب سے ٹیلی فونک رابطہ

روسی صدر ولادی میر پیوٹن کا اپنے مصری ہم منصب سے ٹیلی فونک رابطہ،خطے کی تازہ ترین صورت حال پر تبادلہ خیال کیا ہے۔ روسی صدر نے اپنے دورہ سعودی عرب اور دورہ امارات کے بارے میں بھی صدر السیسی کو اعتماد میں لیا۔

غیر ملکی خبر رساں ایجنسی کے مطابق پیوٹن نے صدر السیسی کو سعودی عرب اور امارات میں ہونے والی بات چیت سے آگاہ کیا اور السیسی کا شکریہ ادا کیا کہ وہ کس طرح اپنی انتخابی مصروفیات کے باجود غزہ کے لیے امدادی کارروائیوں میں مصروف رہے۔ پیوٹن نے ان کے لیے نیک تمناؤں کا بھی اظہار کیا۔

واضح رہے روسی صدر یہ بات بار بار کہ چکے ہیں کہ مشرق وسطیٰ میں امریکی سفارتی ناکامی کی وجہ سے حالات اس نہج کو پہنچے ہیں۔ روس خطے میں اپنے اثرات بڑھانے کے لیے سرگرم نظر آتا ہے ۔ چین بھی اس سمت میں اپنی کوششوں کا آغاز کر چکا ہے۔

صدر السیسی کو پیوٹن کی یہ فون کال ایسے وقت میں موصول ہوئی ہے جب وہ اگلی مدت کے لیے بھی صدارتی انتخاب لڑ رہے ہیں۔ صدر پیوٹن نے بھی ایک روز قبل ہی اگلے سال مارچ میں متوقع روسی صدارتی انتخاب میں امیدوار بننے کا اعلان کیا ہے۔