جوبائیڈن انتظامیہ کی اسرائیل کو ٹینکوں کے لئے گولہ بارود فراہم کرنے کی منظوری

جوبائیڈن انتظامیہ نے ہنگامی صورت حال میں استعمال کیے جانے والے اختیارات کے تحت اسرائیل کو ٹینکوں کے 14 ہزار گولے فراہم کرنے کی منظوری دی ہے۔ کانگریس سے اس کی منظوری بعد میں لی جائے گی۔

غیر ملکی خبر رساں ایجنسی کے مطابق اسرائیل کے لیے امریکہ کی یہ جنگی امداد اس ایک پیکج کا حصہ ہے جس کے تحت امریکی ساختہ ٹینکوں مرکاوا کے45 ہزار ہزارگولے دینے کا فیصلہ کیا گیا ہے۔ پیکج میں دوسرا جنگی اسلحہ اس کے علاوہ ہے۔

امریکی انتظامیہ کے فیصلے کے حوالے سے بتایا گیا ہے کہ  آرم ایکسپورٹ کنٹرول ایکٹ ایمرجنسی کے تحت دیئے جانے والے ٹینکوں کے گولوں کی مالیت 106.5 ملین ڈالرہے۔ پینٹاگون کے اعلان کے مطابق یہ گولے اسرائیل کو فوری طور پر فراہم کیے جائیں گے۔

واضح رہے ایک امریکی ترجمان نے تین روز قبل کہا تھا کہ اسرائیل کے ساتھ امریکہ نے جنگی ٹائم ٹیبل کے پلان پر تبادلہ خیال کیا ہے۔ اس دوران یہ اطلاعات بھی سامنے آئیں کہ امریکہ جنگ کو ماہ دسمبر کے آخر تک مکمل کرنے کے حق میں ہے، تاہم یہ نہیں بتایا گیا تھا اسرائیلی کےجنگی ٹائم ٹیبل کے تحت امریکہ اسلحے کے کھاتے میں اسرائیل کو کس حد تک امداد دے گا۔ اب یہ چیزیں سامنے آنے لگی ہیں۔

امریکی ساختہ ٹینک مرکاوا  کے فوری بھجوائے جانے والے 14 ہزار گولے اس پیکج کا حصہ ہیں جس کے تحت امریکہ اسرائیل کو 500 ملین ڈالر مالیت کا اسلحہ دے گا، امریکہ کے مرکاوا  ٹینک غزہ میں استعمال ہونے کے علاوہ اسرائیل کی طرف سے لبنانی سرحد پر بھی تعینات کیے گئے ہیں۔ اسرائیلی گولہ باری سے ہلاک ہونے والے لبنانی صحافی عصام عبداللہ کو اسی 'مرکاوا ' ٹینکے گولے سے نشانہ بنایا گیا تھا۔

واشنگٹن میں انسانی حقوق کے لیے کام کرنے والے ادارے تشویش ظاہر کر رہے ہیں کہ اسرائیل کو اسلحہ بھجوانا سویلینز کی ہلاکتوں پر امریکی اظہار تشویش سے مطابقت نہیں رکھتا۔ تاہم امریکی دفتر خارجہ کے ایک ذمہ دار افسر نے کہا ہے ' امریکہ اسرائیل پریہ واضح کرتا رہے گا کہ بین الاقوامی قوانین کا احترام کرتے ہوئے شہریوں کے نقصان سے گریز کرے۔'

پینٹاگون کے ایک بیان کے مطابق امریکی وزیر خارجہ انتونی بلینکن نے کانگریس کو بتایا ہے کہ 'امریکہ کا اسرائیل کو فوری اسلحہ بھیجنا خود امریکی قومی سلامتی کے مفاد میں ہے۔