پاکستان اور یو اے ای کے درمیان بڑا معاہدہ طے پا گیا

پاکستان اور متحدہ عرب امارات نے ریلوے، اقتصادی زونز اور ڈھانچہ جاتی ترقی میں تعاون کے لئے تین ارب ڈالر سے زائد کی سرمایہ کاری کے معاہدے پر دستخط کئے ہیں ،  اس حوالے سے معاہدہ سوئٹزر لینڈ کے شہر ڈیووس میں عالمی اقتصادی فورم کے موقع پر پاکستان  اور ڈی پی ورلڈ کمپنی کے درمیان ہوا۔

 وزارت ریلوے کی جانب سے جاری کردہ بیان  کے مطابق مواصلات، ریلوے اور سمندری امور کے وفاقی وزیر شاہد اشرف تارڑ اور دبئی کے بندرگاہوں، کسٹمزاور فری زون کارپوریشن کے سربراہ سلطان احمد بن سلمان  نے اپنی اپنی حکومتوں کی جانب سے دستاویز پر دستخط کئے۔

 شاہد اشرف تارڑ نے اس موقع پر اظہارخیال کرتے ہوئے کہا کہ ڈی پی ورلڈ کمپنی جوکہ دبئی حکومت کی جانب سے کام کرے گی،پاکستان میں عرصہ دراز سے فخریہ انداز میں کام کررہی ہے۔

انہوں نے کہا کہ دونوں برادر ملکوں نے غیر متزلزل اعتماد اور شراکت داری پر مبنی تعلقات کی بنیاد پر اہم منصوبوں کے ذریعے اقتصادی تعاون مزید مستحکم کرنے کا فیصلہ کیا ہے ، سلطان احمد بن سلمان  نے اپنے تاثرات میں کہا کہ پاکستان ایک ترقی کرتی ہوئی معیشت اور وسطی ایشیا کے لئے ایک اہم تجارتی راہداری ہے۔