او آئی سی کے رکن ملکوں کے محتسبین نے عالمی ناانصافیوں کے خلاف آواز اٹھانے کا عزم

اسلامی تعاون تنظیم کے رکن ملکوں کے محتسبین نے عالمی ناانصافیوں کے خلاف آواز اٹھانے کے عزم کا اعادہ کیا ہے۔

مسلم دنیا کے محتسبین نے او آئی سی محتسب ایسوسی ایشن کے بورڈ اجلاس میں شرکت کی۔

سیکرٹری جنرل  اور پاکستان کے وفاقی ٹیکس محتسب ڈاکٹر آصف محمود جاہ نے اجلاس سے خطاب کرتے ہوئے کہا کہ ہمیں روزانہ مصائب کا سامنا کرنے والوں کی چیخ وپکار کو دنیا تک پہنچانے کیلئے اجتماعی کوششیں کرنی چاہئیں۔

ایکیوا  کے صدر اور ترکیہ کے محتسب اعلی سیرف ملکوک نے یورپی ممالک میں بڑھتے ہوئے اسلام مخالف پروپیگنڈہ کے مسئلے کو اجاگر کیا اور فلسطین میں جاری نسل کشی جیسے غیرانسانی اقدام کا ذکر کیا۔انہوں نے اس افسوسناک صورتحال اور بربادی پر عالمی رہنماوں کی خاموشی پر مایوسی کااظہار کیا۔بورڈ ارکان نے فلسطین میں جاری پرتشدد کارروائیوں کی متفقہ طور پر مذمت کی اورایکیوا  کی قیادت کی طرف سے فوری اور عملی اقدامات کے مطالبے کی مکمل حمایت کا اعلان کیا۔