خیبرپختونخوا حکومت کا صوبے بھر میں پھر سے صحت کارڈ بحالی کا اعلان

خیبرپختونخوا میں پھر سے صحت کارڈ بحالی کا اعلان کر دیا گیا ہے۔ صحت کارڈ کی بحالی کا فیصلہ وزیراعلیٰ خیبرپختونخوا علی امین گنڈاپور نے کی زیرصدارت اجلاس میں کیا گیا۔

وزیر اعلیٰ خیبر پختونخوا علی امین گنڈاپور نے یکم رمضان سے صحت کارڈ کے تحت 100 فیصد آبادی کے لئے مفت علاج بحال کردیا۔

صحت کارڈ کے تحت مفت علاج بحال کرنے کے لیے پانچ ارب روپے جاری کر دیئے گئے ہیں۔ جبکہ اجلاس میں صحت کارڈ کی مد میں اسٹیٹ لائف کے بقایاجات کی ادائیگی کے لیے ماہانہ پانچ ارب روپے جاری کرنے کا اصولی فیصلہ کیا گیا ہے۔

اس موقع پر وزیر اعلیٰ خیبر پختونخواہ علی امین گنڈا پور کا کہنا تھا کہ امن و امان کے بعد عوام کی فلاح و بہبود صوبائی حکومت کی اہم ترجیح ہے، صحت کارڈ عوامی فلاح و بہبود کا اہم منصوبہ ہے۔اس کو ہر حال میں جاری رکھا جائے گا۔

انہوں نے کہا کہ اسٹیٹ لائف کے بقایا جات کی ادائیگی کے لئے ترجیحی بنیادوں پر فنڈز فراہم کئے جائیں گے، جبکہ ان کا مزید کہنا تھا کہ اس اسکیم میں شفافیت کو یقینی بنانے کے لئے ضروری اصلاحات کی جائیں گی تاکہ اس کا ذیادہ سے زیادہ فائدہ عوام کو پہنچ سکے۔