آسٹریلیا کو مستقبل قریب میں کئی دہائیوں تک جاری رہنے والی شدید خشک سالی کا سامنا کرنا پڑ سکتا ہے، تحقیقی رپورٹ

کینبرا: آسٹریلیا کو مستقبل قریب میں کئی دہائیوں تک جاری رہنے والی شدید خشک سالی کا سامنا کرنا پڑ سکتا ہے۔

شنہوا کے مطابق آسٹریلیا کی نیشنل یونیورسٹی کے ماہرین نے 850 اور 2000 کے درمیان آسٹریلیا میں آنے والے خشک سالی کے سپیلز کا آب و ہوا کےمتعدد ماڈلز کا استعمال کرتے ہوئے اس غرض سے مطالعہ کیا تاکہ یہ معلوم کیا جا سکے کہ وہ مستقبل میں کیسے تبدیل ہو سکتے ہیں۔

ماہرین کے مطابق 20 ویں صدی میں جنوب مغربی اور مشرقی آسٹریلیا میں خشک سالی صنعتی دور سے پہلے کے زمانے کے مقابلے میں اوسطاً طویل تھی۔

اس کےنتائج کا تجزیہ کرتے ہوئے ماہرین نے خبردار کیا کہ آسٹریلیا کو مستقبل قریب میں طویل عرصہ تک جاری رہنے والے خشک سالی کے سپیلز کا سامنا کرنا پڑ سکتا ہے جن کی طوالت میں ماحولیاتی تبدیلیوں کے ساتھ اضافہ ہو سکتا ہے۔

تحقیقی رپورٹ کے شریک مصنف جارجی فالسٹر نے کہا کہ ہمارے سامنے آنے والے نتائج میں سے ایک یہ ہے کہ آسٹریلیا میں مستقبل میں کسی خشک سالی کا دورانیہ ان تمام مدتوں سے کہیں زیادہ طویل ہو سکتا ہے جس کا ماضی میں مشاہدہ کیا ہے اور یہ 20 سال یا اس سےبھی زیادہ ہو سکتا ہے۔