آئرلینڈ کے نومنتخب وزیراعظم کا فلسطین کو تسلیم کرنے کا اعلان

آئرلینڈ کے نومنتخب وزیراعظم سائمن ہیرس نے فلسطین کو تسلیم کرنے کا اعلان کردیا۔

ایک تقریب سے خطاب کرتے ہوئے سائمن ہیرس نے غزہ میں جنگ بندی اور امداد کی فراہمی کا پُر زور مطالبہ کیا۔ اسرائیلی وزیراعظم نیتن یاہو کے اقدامات سے تنگ آچکے ہیں، اب جنگ بند کریں اور امداد کی رسائی کو محفوظ بنائیں۔

سائمن ہیرس نے کہا کہ ہمیں دو ریاستی حل کی ضرورت ہے، اسرائیل اور فلسطین کو امن و سلامتی سے رہنا چاہیے۔

انہوں نے مزید کہا کہ آج رات گیلوے سے میں اس بات پر زور دیتا ہوں کہ آئرلینڈ فلسطین کو ریاست تسلیم کرنے کے لیے تیار ہے۔

واضح رہے کہ آئرلینڈ طویل عرصے سے فلسطینی عوام کے حقوق کے لیے آواز اٹھاتا رہا ہے اور اس نے مسلسل فلسطینی علاقوں پر قبضے کے خاتمے اور ایک آزاد فلسطینی ریاست کے قیام کا مطالبہ کیا ہے۔

وزیر اعظم کا یہ بیان فلسطینی کاز کو آگے بڑھانے اور تنازعہ کے منصفانہ اور دیرپا حل کے حصول کے لیے ٹھوس اقدامات کرنے کے لیے آئرلینڈ کی آمادگی کی نشاندہی کرتا ہے۔