پاکستان پبلک ورکس ڈیپارٹمنٹ کو ناقص کارکردگی کے باعث ختم کرنے کا فیصلہ

وزیراعظم شہباز شریف نے  پاکستان پبلک ورکس ڈیپارٹمنٹ کو سال ہا سال ناقص کارکردگی اور کرپشن پر فوری طور پر ختم کرنے کی ہدایات جاری کردیں ۔ 

اسلام آباد وزیراعظم آفس میں  محمد شہباز شریف کی زیر صدارت حکومتی اخراجات اور حکومتی ڈھانچے کا حجم کم کرنے کے حوالے سے اہم اجلاس طلب کیا گیا جس میں چند  اہم فیصلے کیے گئے ۔ 

وزیراعظم شہباز شریف نے کہا کہ پاک پی ڈبلیو ڈی بطور ادارہ اپنے مقاصد کے حصول میں ہمیشہ ہی  ناکام رہا ہے ۔ 

وزیراعظم شہباز شریف نے ہدایات جا ری کیں کہ ایسے جاری ترقیاتی منصوبے جن کا کام پاک پی ڈبلیو کے حوالے کیا گیا ہے ان کے لئے متبادل لائحہ ء عمل تیار کیا جائے ۔ 
 
حکومتی اخراجات کم کرنے کے حوالے سے  ڈپٹی چیئرمین پلاننگ کمیشن جہانزیب خان کی صدارت میں بنائی گئی کمیٹی نے اپنی رپورٹ کے حوالے سے وزیراعظم کو آگاہ کیا ۔ 

کمیٹی کی کچھ سرکاری اداروں کو ختم اور کچھ کو ضم کرنے کی سفارش بھی پیش کی گئی ۔ 

اجلاس میں نائب وزیراعظم و وزیر خارجہ اسحاق ڈار ، وفاقی وزیر منصوبہ بندی احسن اقبال ، وفاقی وزیر خزانہ و محصولات محمد اورنگزیب ، وفاقی وزیر اقتصادی امور احد خان چیمہ ، مشیر وزیراعظم برائے سیاسی امور رانا ثناءاللہ،  وزیر مملکت برائے خزانہ و محصولات ،ڈپٹی چیئرمین پلاننگ کمیشن جہانزیب خان اور متعلقہ اعلیٰ سرکاری افسران نے بھی  شرکت کی ۔