رومانوی اداکار سنتوش کمار کو مداحوں سے بچھڑے 42 برس بیت گئے

پاکستان فلم انڈسٹری کے پہلے رومانوی اداکار سنتوش کمار کو مداحوں سے بچھڑے 42 برس بیت گئے ہیں۔

باوقار اور سحر انگیز شخصیت کے مالک سنتوش کمار 25 دسمبر 1925ء کو لاہور میں پیدا ہوئے، ان کا اصل نام سید موسیٰ رضا تھا، اداکار 1950ء میں پہلی پنجابی فلم ’’بیلی‘‘ میں جلوہ گر ہوئے، 1957ء میں فلم ’’وعدہ‘‘ ریلیز ہوئی اور یہ فلم بہت کامیاب رہی۔

ماضی کے معروف اداکار سنتوش کمار نے اپنے کیریئر میں 92 فلموں میں کام کیا، ان کی کامیاب فلموں میں موسیقار، گھونگھٹ، رشتہ، دامن، سفید خون، بیس دن، آزاد، چنگاری، حویلی اور فیشن شامل ہیں، فلم وعدہ پر بہترین اداکار کا پہلا نگار ایوارڈ دیا گیا۔

سنتوش کمار نے وہ عزت اور مقام حاصل کیا جو بہت کم اداکاروں کو نصیب ہوا، رومانوی کرداروں کو اپنی اداکاری سے یادگار بنانے والے سنتوش کمار نے کئی اداکاراؤں کیساتھ کام کیا لیکن اپنے دور کی سب سے خوبرو اداکارہ صبیحہ خانم کے آگے دل ہار بیٹھے اور ان کو اپنا شریک حیات بنا لیا۔

اپنے انداز کا یہ منفرد فنکار سنتوش کمار 11جون 1982ء میں اپنے پرستاروں کو سوگوار چھوڑ کر اس دنیا فانی سے رخصت ہو گیا لیکن اداکار کا فن فلم انڈسٹری اور مداحوں کے دلوں میں آج بھی زندہ ہے۔