5 ہزار ارب روپے سے زائد کا پنجاب بجٹ کل پیش کیا جائے گا، بجٹ کا کل حجم 5ہزار 3 سو 70 ارب روپے متوقع ہے۔

میڈیا رپورٹس کے مطابق صوبائی وزیر خزانہ مجتبیٰ شجاع الرحمان بجٹ پیش کریں گے ، پنجاب کو 3700 ارب وفاق سے این ایف سی کے تحت ملنے کا بھی امکان ہے جبکہ پنجاب میں ذرائع آمدن کی مد میں محصولات کا ہدف ایک ہزار 26 ارب روپے ہوگا ۔ بجٹ میں تنخواہوں کی مد میں 595 ارب اور پنشن کی مد میں 445 ارب روپے رکھے جائیں گے ، سروس ڈلیوری اخراجات کا تخمینہ 840 ارب روپے لگایا گیا ہے۔

ترقیاتی بجٹ کا حجم 700ارب روپے مختص کرنے کی تجویز ہے جبکہ لاہور رمضان پیکج 30 ارب، سی بی ڈی کو 8 ارب دیئے جائیں گے، آئندہ مالی سال میں 1863 سکیموں کو مکمل کیا جائی گا۔ آئندہ مالی سال میں 1617 جاری جبکہ 246 نئی سکیمیں مکمل کرنے کی تجویز ہے جبکہ سب سے زیادہ بجٹ روڈ سیکٹر سکیموں کیلئے 1 کھرب 21 ارب 74 کروڑ 60 لاکھ مختص کیا گیا ہے۔ بجٹ میں سپیشل ایجوکیشن کیلئے دو ارب، رسمی و غیر رسمی تعلیم کیلئے تین ارب 50 کروڑ مختص کیے گئے ہیں ۔

صوبائی بجٹ میں سپورٹس اینڈ یوتھ افیئر کے لیے چار ارب 87 کروڑ 50 لاکھ مختص کیے گئے ہیں جبکہ سپیشلائزڈ ہیلتھ کیئر 76 ارب 61 کروڑ 50 لاکھ ، پرائمری ہیلتھ کیئر کے لیے 33 ارب 89 کروڑ 70 لاکھ مختص کیے گئے ہیں ۔صوبائی بجٹ میں پاپولیشن ویلفیئر تین ارب، واٹر سپلائی اینڈ سینیٹیشن 8 ارب نو کروڑ 90 لاکھ مختص کیے گئے ہیں۔ متوقع بجٹ میں سوشل ویلفیئر ایک ارب پانچ کروڑ 79 لاکھ ، ویمن ڈیویلپمنٹ کیلئے 92 کروڑ 60 لاکھ رکھے گئے ہیں۔
ذرائع محکمہ خزانہ پنجاب کے مطابق لوکل گورنمنٹ کیلئے 14 ارب چارکروڑ 80 لاکھ مختص کیے گئے ہیں ، بجٹ کی حتمی منظوری اسمبلی اجلاس سے پہلے کابینہ دے گی۔

دوسری جانب سندھ حکومت آئندہ مالی سال 25-2024کا بجٹ  جمعہ کے روز پیش کرے گی۔سندھ حکومت کے نئے مالی سال کے بجٹ کا مجموعی حجم ساڑھے 23 کھرب سے زیادہ ہوگا ۔اس بجٹ میں سالانہ ترقیاتی پروگرام میں 430ارب رکھنے کی تجویز دے دی گئی ہے ۔

ذرائع کے مطابق سندھ کابینہ کا اجلاس 14 جون کو صبح 9 بجےطلب کیا گیا ہے۔ اجلاس میں بجٹ کی منظوری دی جائے گی۔وزیر اعلیٰ مراد علی شاہ سندھ کے آئندہ مالی سال کا بجٹ پیش کریں گے۔واضع رہے 2024۔25 سندھ کے بجٹ جمعہ کے روز پیش کیا جاے گا اورصوبائی کابینہ کےاجلاس میں منظوری دی جائے گی یہ اجلاس صبح 9بجے شروع ہو گا وزیر اعلی سندھ حود کریں گے۔