وزیر اعلی ٰ پنجاب مریم نواز کا راولپنڈی تا مری ٹورسٹس گلاس ٹرین چلانے کا فیصلہ

مری: وزیر اعلیٰ پنجاب مریم نواز اور نواز شریف نے اجلاس کی صدارت کرتے ہوئے سیاحت کے فروغ کے لیے مری ڈیولپمنٹ پلان کی منظوری دے دی۔ 
اجلاس میں سینیئر صوبائی وزیر مریم اورنگزیب نے مری ڈیولپمنٹ پلان پر تفصیلی بریفنگ دی، جس کی روشنی میں ڈیولپمنٹ پلان کے تحت ڈویلپمنٹ، بیوٹیفیکیشن اور تعمیر و بحالی کے پراجیکٹس منظور کیے گئے۔ 
دوران اجلاس راولپنڈی تا مری ٹورسٹس گلاس ٹرین چلانے کا فیصلہ کیاگیا۔ ٹورسٹس گلاس ٹرین کے پراجیکٹ کے لیے  انٹرنیشنل  کنسلٹنٹ کی خدمات حاصل کرنے پر اتفاق ہوا۔  
مری سمیت ہر شہر کے تاریخی علاقے اور عمارت کے پرانے نام بحال کرنے کا فیصلہ کیا گیا، جس کے لیے وزیر اعلیٰ پنجاب  مریم نواز نے قانون سازی کرنے کی ہدایت جاری کر دی۔ 
مری میں ٹریفک کے مسائل سے نمٹنے کے لیے جی پی او چوک پر موجود ہوٹلوں کو متبادل مقامات پر منتقل کرنے کا فیصلہ کیا گیا۔ مال روڈ پر موجود عمارتوں کے رنگ و روپ میں یکسانیت لانے کی تجویز پر بھی اتفاق کیا گیا۔ 
جھیکا گلی چوک کی ری ماڈلنگ، تجاوزات ہٹا کر جگہ کی کشادگی، لارنس کالج روڈ، بوسٹال موڑ تا بروڑی روڈ بنانے کی منظوری بھی دی گئی۔ 
ساہلی ہسپتال کی اپ گریڈیشن، سٹریٹ لائٹس اور پبلک ٹوائلٹس کی بحالی، اور مری کے 16 اندرونی سڑکوں کی بحالی مکمل 
ہونے پر بھی وزیر اعلیٰ پنجاب کو بریفنگ دی گئی۔
وزیر اعلیٰ مریم نواز نے مری میں پانی کی فراہمی کے لیے قلیل و طویل مدتی پلان بنانے کا حکم دیا۔ اجلاس کے دوران گھروں کی چھتوں پر گرنے والے بارش کے پانی کو محفوظ کر کے استعمال میں لانے کے تجویز پر اتفاق کیا گیا۔ مجوزہ منصوبوں سے مری میں روزانہ 6 لاکھ گیلن سے زائد پانی کی فراہمی ممکن ہو گی۔ 
وزیر اعلیٰ پنجاب مریم نواز کی زیر صدارت اجلاس میں غیر قانونی عمارات کی اجازت دینے والے حکام کے خلاف کارروائی کرنے کا فیصلہ کیا گیا۔