ملک کے بیشتر علاقوں میں گرمی برقرار، متعدد میں بارش کا امکان

ملک کے بیشتر علاقوں میں موسم گرم اور مرطوب رہے گا جبکہ مختلف علاقوں میں بارش کی پیشگوئی بھی کی گئی ہے۔

ملک بھر کے تمام علاقے بدستور شدید گرمی کی لپیٹ میں ہیں تاہم بعض مقامات پر بارش سے گرمی کی شدت میں معمولی کمی آ گئی ہے۔

گزشتہ روز اسلام آباد کے مختلف علاقوں سمیت کئی شہروں میں بارش ہوئی ، محکمہ موسمیات نے کل سے بحیرہ عرب اور خلیج بنگال سے مون سون ہوائیں ملک کے بالائی علاقوں میں داخل ہونے کا امکان ظاہر کیا ہے۔

محکمہ موسمیات کے مطابق آج سے 7 جولائی کے دوران اسلام آباد، پنجاب ،خیبر پختونخوا ،بلوچستان اور کشمیر میں بھی بارشیں ہوں گی۔

دوسری جانب مون سون کے دوران خیبر پختونخوا کے 11 اضلاع کو سیلابی صورتحال کے حوالے سے حساس ترین قرار دیا گیا ہے ، پی ڈی ایم اے نے 14 اضلاع میں درمیانے درجے کا سیلابی الرٹ جاری کر دیا ہے۔

پی ڈی ایم اے نے متعلقہ اداروں کو ہدایت کی ہے کہ شہریوں کو سیلابی صورتحال سے نمٹنے کے طریقوں سے آگاہ کیا جائے۔