پنجاب پولیس نے انٹرپول کی مدد سے یو اے ای میں 9 ملزمان گرفتار کر لئے

لاہور: پنجاب پولیس نے انٹرپول کی مدد سے متحدہ عرب امارات (یو اے ای) سے سنگین جرائم میں ملوث 9 ملزمان کو گرفتار کر لیا ہے۔

گرفتار ملزمان میں عرفان اصغر، فرحان نزاکت، ثمر عباس، نجیب اللہ، صدام حسین، محمد رفیق، محمد ثاقب، محمد عثمان اور طارق محمود شامل ہیں۔ان ملزمان کے خلاف قتل اور اقدام قتل کی دفعات کے تحت مقدمات درج تھے۔

ملزم طارق محمود گزشتہ 14 سال سے پنجاب پولیس کو مطلوب تھا جبکہ ملزم محمد رفیق کے خلاف سال 2011 میں مقدمہ درج ہوا تھا۔ملزم نجیب اللہ سال 2014 جبکہ ملزم صدام حسین سال 2018 میں قتل کر کے بیرون ملک فرار ہو گیا تھا۔

دیگر گرفتار ملزمان کے خلاف مقدمات سال 2020 سے 2023 کے دوران درج کیے گئے تھے۔گرفتار ملزمان میں سے 3 سیالکوٹ پولیس، 2 ڈی جی خان پولیس، 1 فیصل آباد پولیس، 1 گجرانوالہ پولیس، 1 پاکپتن پولیس اور 1 بھکر پولیس کو مطلوب تھے۔

ملزمان قتل کر کے بیرون ملک فرار ہو گئے تھے جنہیں یو اے ای کے مختلف علاقوں سے گرفتار کیا گیا۔گرفتار ملزمان کو یو اے ای سے پاکستان منتقل کرنے کے لیے ایک ٹیم روانہ کر دی گئی ہے۔

ملزمان کو لاہور ائیرپورٹ پر پنجاب پولیس حکام کے حوالے کیا جائے گا۔