ارشد ندیم پیرس اولمپکس میں پاکستان کی واحد امید، نیرج چوپڑا سے مقابلہ

کراچی: پیرس اولمپکس میں پاکستان کی تمام نگاہیں جیولین تھرو کے ورلڈ چیمپئن شپ کے سلور میڈلسٹ ارشد ندیم پر لگی ہوئی ہیں۔ ارشد ندیم نے اس اہم مقابلے کیلئے انتہائی سخت محنت کی ہے اور وہ مثبت نتائج کے لیے پُر عزم ہیں۔

جیولین تھرو مقابلوں کے گروپس کا اعلان کر دیا گیا ہے اور دلچسپ بات یہ ہے کہ ارشد ندیم اور بھارتی ہم عصر نیرج چوپڑا ایک ہی گروپ میں شامل ہیں۔ دونوں ہی کھلاڑیوں کے درمیان سخت مقابلہ متوقع ہے۔ پاکستانی وقت کے مطابق 2 بج کر 50 منٹ پر ابتدائی کوالیفائنگ مقابلے شروع ہوں گے اور ارشد ندیم پانچویں نمبر پر تھرو کرنے آئیں گے۔

ارشد ندیم کے گروپ میں عالمی نمبر 5 ایڈیس میٹوشیویسیئس اور نمبر 6 اینڈرسن پیٹرس بھی شامل ہیں۔ علاوہ ازیں، 90 میٹر کی تھرو کرنے والے جرمنی کے میکس ڈینھنگ بھی گروپ بی کا حصہ ہیں۔ اس سے اندازہ لگایا جا سکتا ہے کہ ارشد ندیم کو اس گروپ میں سخت مقابلے کا سامنا کرنا پڑے گا۔

میڈل راؤنڈ کے لیے کوالیفکیشن معیار کو پچھلے ایونٹ سے بڑھا دیا گیا ہے۔ اس بار کم از کم 84 میٹر کی تھرو کرنے والے پلیئر کی میڈل راؤنڈ میں رسائی یقینی ہوگی۔ فائنل راؤنڈ میں مجموعی 12 پلیئرز جگہ بنائیں گے۔ اگر 84 میٹر تھرو کرنے والے پلیئرز کی تعداد 12 سے کم ہوئی تو بہترین تھرو والے پلیئرز کوالیفائی کرپائیں گے۔

پوری قوم کی نگاہیں ارشد ندیم پر لگی ہوئی ہیں اور وہ اس امید کے ساتھ میدان میں اتر رہے ہیں کہ وہ پاکستان کو اولمپکس میں میڈل دلوائیں گے۔ ارشد ندیم کی کامیابی پاکستان کے لیے ایک بڑی فتح ہوگی اور اس سے نوجوانوں کو بھی حوصلہ ملے گا۔