ملک بھر میں شدید بارشوں کی پیشگوئی، محکمہ موسمیات کا انتباہ

اسلام آباد: محکمہ موسمیات نے ملک کے مختلف علاقوں میں شدید بارشوں کا انتباہ جاری کیا ہے۔ 

محکمہ موسمیات کے مطابق سندھ، بلوچستان، خیبرپختونخوا، جنوبی/بالائی پنجاب، خطہ پوٹھوہار، کشمیر اور گلگت بلتستان میں تیز ہوائیں چلنے اور گرج چمک کے ساتھ بارش جبکہ شمال مشرقی/جنوبی بلوچستان، بالائی سندھ، بالائی خیبرپختونخوا، شمال مشرقی پنجاب، خطہ پوٹھوہار اور کشمیر میں چند مقامات پر موسلادھار بارش ہونے کا امکان ہے۔

ڈیرہ غازی خان کے پہاڑی علاقوں، ژوب، بارکھان، موسیٰ خیل، لورالائی، سبی، ہرنائی، کوہلو، ڈیرہ بگٹی، جھل مگسی، نصیر آباد، جعفر آباد، قلات، خضدار، لسبیلہ، آواران، کیچ، پنجگور جیکب آباد، قمبر، شہداد کوٹ، لاڑکانہ، دادو، جامشورو، مری، گلیات، مانسہرہ، دیر، سوات، شانگلہ، نوشہرہ، صوابی، اسلام آباد، راولپنڈی، سیالکوٹ، نارووال، جہلم، گجرات اور کشمیر کے مقامی بر ساتی ندی نالوں میں طغیانی کا خطرہ ہے۔

اسلام آباد، راولپنڈی، گوجرانوالہ، سیالکوٹ، بہاولنگر، بہاولپور، راجن پور، رحیم یار خان، کراچی، حیدرآباد، ٹھٹھہ، بد ین، سکھر، کشمور، گھوٹکی، شکارپور اور خیرپور کے نشیبی علاقے زیر آب آنے کا اندیشہ ہے۔

خیبرپختونخوا کے پہاڑی علاقوں، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمد و رفت متاثر ہونے کا خطرہ ہے۔