لاہور سمیت ملک کے مختلف شہروں میں بارش سے موسم خوشگوار

لاہور : ملک بھر میں مون سون کا نیا دور شروع ہو چکا ہے جس کے باعث صبح سویرے لاہور سمیت مختلف شہروں میں ہونے والی بارشوں نے موسم کو خوشگوار بنا دیا ہے۔ تاہم شدید بارشوں کے باعث کئی علاقوں میں مشکلات کا سامنا بھی ہے۔

محکمہ موسمیات کے مطابق لاہور کے علاقوں جیل روڈ پر 7، گلبرگ میں 3 ملی میٹر بارش ریکارڈ کی گئی جبکہ لکشمی چوک میں 12، پانی والا تالاب میں 8 اور قرطبہ چوک میں 5 ملی میٹر بارش ریکارڈ ہوئی ہے۔

لاہور کے مختلف علاقوں ایبٹ روڈ، شملہ پہاڑی، گڑھی شاہو اور ریلوے سٹیشن کے اطراف میں خوب بادل برسے جس سے نشیبی علاقوں میں پانی جمع ہو گیا۔ ضلعی انتظامیہ کو ان علاقوں میں پانی نکالنے کے لیے دوڑیں لگانی پڑگئیں۔

پنجاب کے شہروں صفدر آباد، سانگلہ ہل اور گردونواح میں موسلادھار بارش سے جل تھل ایک ہو گیا ہے۔ کلور کوٹ میں گرج چمک کیساتھ بارش نے رنگ جما دیا جبکہ چنیوٹ میں موسلا دھار بارش سے نشیبی علاقے زیر آب گئے ہیں، جس نے انتظامیہ کے دعوؤں کی قلعی کھول دی ہے۔

محکمہ موسمیات کے مطابق آج بالائی خیبر پختونخوا، خطہ پوٹھوہار، اسلام آباد، شمال مشرقی پنجاب، کشمیر اور گلگت بلتستان میں تیز ہواؤں اور گرج چمک کے ساتھ بارش کا امکان ہے۔ ملک کے دیگرعلاقوں میں موسم گرم اور خشک رہے گا۔