اسرائیل کے پیجرز اور واکی ٹاکی دھماکوں کے بعد جنوبی لبنان میں 70مقامات پر حملے

اسرائیل کی جانب سے پیجرز اور واکی ٹاکی دھماکوں کے بعد جنوبی لبنان میں 70 سےزائد مقامات پر 100 سے زائد حملے کر دیئے۔

غیر ملکی میڈیا رپورٹ کےمطابق اسرائیلی فوج کا کہنا ہے کہ گزشتہ شب اسرائیلی ہوائی جہازوں نے 2 گھنٹوں تک جنوبی لبنان میں مختلف علاقوں کو اہداف کا نشانہ بنایا جہاں راکٹ لانچر بیرلز کو اسرائیل پر حملے کیلئے تیار کیا جا رہا تھا۔

دوسری جانب لبنان کے سرکاری خبر ایجنسی کے مطابق اسرائیل کی جانب سے جنوبی لبنان میں 70 سے زائد مقامات پر سو سے زائد ہوائی حملوں میں بمباری کی گئی ہے، تاحال حملوں میں کسی ہلاکت کی اطلاعات موصول نہیں ہوئیں۔

خیال رہے کہ اس سے قبل امریکی صدر جوبائیڈن نے ایک بیان میں حزب اللہ اور اسرائیل کے درمیان کشیدگی میں اضافے کا خدشہ ظاہر کرتے ہوئے تنازعے کے سفارتی حل کو ممکن اور بہترین راستہ قرار دیا تھا۔

علاوہ ازیں برطانیہ کی جانب سے بھی حزب اللہ اور اسرائیل کے درمیان کشیدگی کے فوری خاتمے اور جنگ بندی کا مطالبہ کیا گیا تھا تاہم اسرائیل نے دونوں ہی باتوں کو پس پشت ڈالتے ہوئے جنوبی لبنان پر حملے کردیے۔

اسرائیلی وزیر دفاع یواؤ گیلنٹ کا کہنا تھا کہ اسرائیل حزب اللہ کے خلاف اپنی فوجی کارروائیاں جاری رکھے گا، جنگ کے نئے مرحلے میں رسک کے ساتھ ساتھ نئے مواقع بھی موجود ہیں۔ اسرائیل کے شمالی علاقوں کی آبادی کی اپنے علاقوں میں محفوظ واپسی ہمارا مقصد ہے، حزب اللہ کو اس کی قیمت چکانی پڑے گی، گزرتے وقت کے ساتھ اس بھاری قیمت میں اضافہ ہوتا جائے گا۔