متحدہ عرب امارات کا خلائی مشن آج مریخ کے مدار میں داخل ہوگا

غیرملکی میڈیا کے مطابق متحدہ عرب امارات، چین اور امریکہ کے خلائی جہاز گزشتہ سال مریخ کے سفر پر روانہ ہوئے تھے اور اب اپنی منزل کے قریب ہیں۔ اس دوڑ میں متحدہ عرب امارات کا ہوپ نامی خلائی جہاز سب سے آگے ہے جو آج مریخ کے مدار میں پہنچ جائے گا۔ ہوپ مشن اپنی منزل پر پہنچنے کے بعد 687 دن تک مریخ کے مدار میں گردش کرے گا۔اماراتی خلائی مشن کے پراجیکٹ مینیجر عمران شرف نے کہا کہ یہ ملک کے لیے انتہائی اعزاز کی بات ہے کہ متحدہ عرب امارات اس سال مریخ تک پہنچنے والا پہلا ملک ہوگا۔

رپورٹ کے مطابق چین کا خلائی جہاز اس کے 24 گھنٹوں بعد مریخ کے مدار میں داخل ہو گا۔ امریکی خلائی ادارے کا جہاز اس کے تقریباً ایک ہفتے بعد 18 فروری کو مریخ پہنچے گا۔ جہاں سے وہ پتھر اور نمونے جمع کر کے زمین کی طرف واپسی کا سفر شروع کرے گا۔مریخ سے حاصل شدہ نمونے یہ جاننے میں اہم کردار ادا کر سکتے ہیں کہ اس سیارے پر زندگی موجود ہے یا نہیں۔

واضح گزشتہ سال جولائی میں یو اے ای، امریکا اور چین نے خلائی مشن ایسے وقت پر روانہ کیے تھے جب سیارہ مریخ زمین کے بہت قریب ہوتا ہے۔مشن کامیاب ہونے پر متحدہ عرب امارات مریخ تک پہنچنے والا پانچواں ملک ہوگا جبکہ یو اے ای کے بعد چین مریخ تک پہنچنے والا چھٹا ملک ہوگا۔ماضی میں امریکا، بھات، سابق سوویت یونین اور یورپی خلائی ایجنسی سرخ سیارے مریخ تک پہنچنے میں کامیاب ہوئے ہیں۔