کرم:جھڑپوں سے مزید 6 افراد جاں بحق، اموات کی تعداد 130 ہو گئی

خیبرپختونخوا کے علاقہ کرم میں قبائل کے درمیان جنگ بندی معاہدے کے بعد جھڑپوں کا سلسلہ جاری ہے، دونوں فریقین کے درمیان جھڑپوں سے مزید 6 افراد جاں بحق اور 8 زخمی ہو گئے۔

پولیس حکام کے مطابق فائرنگ کے واقعات میں اب تک 130 افراد جاں بحق اور 186 زخمی ہو چکے ہیں۔

واضح رہے کہ اس قبل پولیس کی جانب سے بتایا گیا ہے کہ 21 نومبر کو مسافرگاڑیوں پر حملے میں 52 افراد جاں بحق ہوئے تھے۔

دوسری جانب ضلعی انتظامیہ کے مطابق پشاور پاراچنار مرکزی شاہراہ 10 روز سے بند ہے جب کہ ڈپٹی کمشنر کرم جاوید اللہ کا کہنا ہے کہ مرکزی شاہراہ بند ہونے سے افغانستان کے ساتھ خرلاچی بارڈر پر تجارت بھی بند ہے، علاقے میں حالات کشیدہ ہونے کے باعث انٹرنیٹ اور موبائل فون سروس بھی معطل ہے۔

جبکہ شاہراہوں کی بندش سے علاقے میں اشیائے خورونوش اور ادویات کی شدید قلت پیدا ہو گئی ہے، جس کے باعث عوام کو شدید مشکلات کا سامنا ہے۔

ڈپٹی کمشنرکرم  کا کہنا ہے کہ لوئر کرم کے مختلف مقامات پر پولیس اور فورسز کے دستے تعینات ہیں، باقی علاقوں میں بھی آج فائر بندی کی بھرپور کوشش کی جائے گی۔