مدارس رجسٹریشن بل پر وزیراعظم نے وزارت قانون کو آئین کے مطابق عملی اقدام کی ہدایت کر دی ،مولانا فضل الرحمان

اسلام آباد:وزیراعظم شہبازشریف نے مدارس رجسٹریشن کے معاملے پر مولانا فضل الرحمان سے ملاقات کے دوران وزارت قانون کو معاملہ حل کرنے کیلئے آئین اور قانون کے مطابق اقدامات کا حکم جاری کر دیا
وزیراعظم ہاؤس میں ہونے والی ملاقات میں رہنما جے یو آئی  عبدالغفورحیدری،کامران مرتضیٰ، راجہ پرویزاشرف، قمرزمان کائرہ، اسپیکر ایازصادق، نائب وزیراعظم اسحاق ڈار، وزیرقانون اعظم نذیرتارڑ، وزیراطلاعات عطا تارڑ، وزیراعظم کے مشیر رانا ثنااللہ اور اٹارنی جنرل منصورعثمان شریک ہوئے۔
ملاقات میں مولانا فضل الرحمان کی مدارس رجسٹریشن کی تجاویزپرمثبت پیشرفت ہوئی ہے اور وزیراعظم نے معاملات کو جلد حل کرنے کی ہدایت کی، امید ہے ایک 2 روز میں اچھی خبرآئےگی۔

وزیراعظم کا کہنا تھاکہ وزارت قانون معاملہ حل کرنے کیلئے آئین وقانون کے مطابق اقدامات کرے۔

ملاقات کے بعد سربراہ جے یو آئی مولانا فضل الرحمان نے میڈیا سےگفتگو کرتے ہوئے  کہا کہ وزیراعظم سے مدارس  بل کے حوالے سے بات چیت ہوئی، ہم نے کہا بل پر جو صورتحال پیدا ہوئی اس پر حکومت فیصلہ کرے، میں نے مفتی تقی عثمانی کو اس ملاقات کی خبر دی، مفتی تقی عثمانی کے اعتماد پر میں  نے وزیراعظم سے ملاقات کی۔

اانہوں نے کہا کہ دینی مدارس کا بل دونوں ایوانوں سےپاس ہوا تھا، وزیراعظم سے اس بل کےحوالےسےبات چیت ہوئی، ہم نےاپنا موقف دہرایا ہے، بل پاس ہونے کے بعد اب ایکٹ بن چکا ہے۔

سربراہ جے یو آئی ف کا کہنا تھا کہ اگرصدر نے بل پراعتراض کرنا تھا تووہ پہلے ہی ہوچکا ہے، اعتراض پر سپیکر کا جواب آنے اور آئینی مدت گزرنے کے بعد اعتراض نہیں بنتا، ہمارا مطالبہ آئین وقانون کے مطابق تھا، انشااللہ اسے تسلیم کیا جائےگا،ان کا مزید کہنا تھا کہ  آج ہماری گفتگو کا موضوع صرف مدارس بل ہی تھا۔