پنجاب میں دھند کا راج ، موٹرویز مختلف مقامات پر بند کر دی گئی

 پنجاب میں دھند کا راج ، موٹرویز مختلف مقامات پر بند کر دی گئی۔

ترجمان موٹروے پولیس کے مطابق موٹر وے ایم 2 لاہور سے کوٹ مومن دھند کی وجہ سے بندکر دی گئی، لاہور سیالکوٹ موٹر وے ایم 11 بھی بند کر دی گئی، موٹر وے ایم 2 ٹھوکر نیاز بیگ سے بابو صابو تک دھند کی وجہ سے بند کی گئی۔

موٹروے ترجمان نے مزید بتایا کہ موٹروے ایم 4 عبد الحکیم سے ملتان تک دھند کی وجہ سے بند کردی گئی، موٹروے ایم 3 پر فیض پور سے ننکانہ تک گاڑیوں کا داخلہ ممنوع قرار دے دیا گیا، ایم 5 شیر شاہ سے ظاہر پیر تک بند کردی گئی۔

ترجمان موٹر وے پولیس کے مطابق موٹرویز کو عوام کی حفاظت اور محفوظ سفر یقینی بنانے کے لئے بند کیا جاتا ہے، ترجمان نے شہریوں سے اپیل کی ہے کہ شہری زیادہ سے زیادہ دن کے اوقات میں سفر کرنے کو ترجیح دیں۔

دوسری طرف ملک بھر میں شدید سردی کی لہر برقرار ہے،بالائی علاقوں میں پہاڑوں نے سفید چادر اوڑھ لی ہے، ہر طرف حسین مناظر نظر آنے لگے۔

گزشتہ روز سے سکردو میں برفباری کا سلسلہ جاری رہا، درجہ حرارت نقطہ انجماد سے کافی نیچے چلا گیا، برفباری کے باعث استور کے علاقوں کا زمینی رابطہ بھی منقطع ہوگیا، وادی نیلم میں برفباری کے بعد سیاحوں کی آمد شروع ہوگئی۔

آزاد کشمیر کے علاقے وادی لیپا میں خون جما دینے والی سردی سے نظام زندگی متاثر ہوگیا، بلوچستان کے شمالی علاقے شدید سردی کی لپیٹ میں رہے، لہہ میں درجہ حرارت منفی 13 کو چھو گیا، گوپس منفی 10، سکردو میں پارا منفی 9 ریکارڈ کیا گیا۔گلگت منفی 7، استور اور ہنزہ میں پارا منفی 6 تک گر گیا، کالام اور قلات میں درجہ حرارت منفی 5 ڈگری سینٹی گریڈ ریکارڈ کیا گیا۔