ملک میں شدید سردی کے ڈیرے، کراچی میں پارہ 8.1 تک گرگیا

ملک میں ان دنوں شدید سردی نے ڈیرے ڈال رکھے ہیں جس کے باعث شمالی علاقہ جات میں درجہ حرارت منفی ریکارڈ کیا جارہا ہے۔

محکمہ موسمیات نے ملک کے اکثر علاقوں میں موسم مزید سرد رہنے کا امکان ظاہر کیا ہے جب کہ پہاڑی علاقوں میں موسم کی شدت برقرار رہے گی۔

محکمہ موسمیات کے مطابق شمال مشرقی پنجاب میں درمیانی سے شدید جب کہ جنوبی پنجاب اور بالائی سندھ میں ہلکی سے درمیانی دُھند چھائے رہنے کی توقع ہے۔

اس کے علاوہ کشمیر ، بالائی خیبر پختونخوا ،خطہ پوٹھوہار اوربالائی پنجاب کے بعض علاقوں میں بھی دھند کا امکان ہے۔

محکمہ موسمیات کے مطابق کراچی میں بھی سردی کی لہر جاری ہے جہاں کم سے کم درجہ حرارت 8.1 ڈگری ریکارڈ کیا گیا ہے۔

محکمہ موسمیات کا کہنا ہےکہ آئندہ 24گھنٹوں کے دوران موسم سرد اورخشک رہنےکا امکان ہے، شہر میں کم سےکم درجہ حرارت 7 سے 9 ڈگری رہ سکتا ہے، شمال مشرق سے ہلکی ہوائیں چل رہی ہیں اور ہوا میں نمی کا تناسب 54 فیصد ہے۔