لاہور پولیس کی بڑی کارروائی،خواتین سمیت منشیات فروش گروہ کے 8 کارندے گرفتار

لاہور: لاہور پولیس نے بڑی کارروائی کرتے ہوئے خواتین سمیت منشیات فروش گروہ کے 8 کارندے گرفتار کرلیے،گرفتار افراد سےکروڑوںروپے مالیت کی چرس برآمد کرلی۔
پولیس کی جانب سےایس پی کینٹ اویس شفیق کی ہدایت پر منشیات فروشوں کے گرد شکنجہ سخت کرتے ہوئے کریک ڈاؤن کا سلسلہ جاری ہے۔
اے ایس پی ڈیفنس شہر بانو نقوی کی سربراہی میں ایس ایچ او فیکٹری ایریا نے پولیس ٹیم کے ساتھ بڑی کارروائی کرتے ہوئے خفیہ اطلاع پر دوران چیکنگ 3 خواتین سمیت 8 بین الاضلاعی منشیات ڈیلر کو منشیات کی ڈلیوری دینے کے لیے آتے ہوئے رنگے ہاتھوں بھاری منشیات سمیت گرفتار کرلیا۔
ترجمان پولیس کی جانب سے بتایا گیا ہے کہ گرفتار ملزمان میں گامن، روبن، ریحان، ناصر محمود، فوزیہ، لبنیٰ شہزادی وغیرہ شامل ہیں۔
پولیس نے ملزمان سے کروڑوں روپے مالیت کی 50 کلو سے زائد چرس برآمد کر کے ان کے خلاف مقدمہ درج کر لیا،جبکہ ان کے دیگر ساتھیوں کی گرفتاری کے لیےپولیس کی جانب سے انٹیلی جنس بیسڈ کارروائیاں جاری ہیں۔
ملزمان نےپولیس کو دیئے گئے بیان میں پشاور سے آن لائن ذرائع استعمال کرکے منشیات منگوا کر مختلف اضلاع میں سپلائی دینے کا اعتراف کرلیا ہے۔