جرمنی میں چاقو حملےسے  2 افراد ہلاک، 2 زخمی

برلن:جرمنی میں چاقو بردار شخص نے حملہ کرتے ہوئے دو سالہ بچے اور ایک شخص کو ہلاک کر دیا، جبکہ چاقو حملے میں 2 افراد شدید زخمی بھی ہوئے ہیں۔
غیر ملکی میڈیا کے مطابق چاقو حملے کا واقعہ جرمنی کے شہر اسکافنبرگ کے ایک پارک میں پیش آیا جہاں ایک چاقو بردار شخص نے بچوں پر حملہ کردیا،جس کےنتیجے میں 2 سالہ بچہ ہلاک ہوگیا جب کہ بچوں کو بچانے کی کوشش میں ایک 41 سالہ شخص بھی ہلاک اور دو زخمی ہوگئے۔
میڈیا رپورٹس کے مطابق حملہ آور نے پولیس کو دیکھ کر پارک سے چھلانگ لگائی اور ریل کی پٹریوں پر بھاگنے لگا جس کے باعث اسکافنبرگ میں ٹرین سروس مختصر طور پر معطل کر دی گئی،جس کوبعد ازاں پولیس نے تعاقب کے بعد حملہ آور کو حراست میں لے لیا ۔
حکام کا کہنا ہے کہ زیر حراست شہری افغان باشندہ ہے اور تارکین وطن کی حیثیت سے پناہ گزین کیمپ میں رہ رہا تھا،علاوہ ازاں پولیس نے ایک اور مشتبہ شخص کو بھی گرفتار کیا ہے جسے بطور گواہ پیش کیا جائے گا تاہم فوری طور پر ایسے کوئی اشارے نہیں ملے کہ وہ حملہ آور کا ساتھی تھا۔
مقامی پولیس حکام کا کہنا ہے کہ اس واقعے میں دو افراد شدید زخمی بھی ہوئے جو ہسپتال میں زیر علاج ہیں۔
واضح رہے کہ پچھلے ماہ دسمبر میں ایک سعودی ڈاکٹر نے کرسمس مارکیٹ میں راہگیروں کو جان بوجھ کر کچل دیا تھا جس میں 6 افراد ہلاک اور 200 زخمی ہوگئے تھے۔