سندھ پولیس کاحیدرآباد میں وکلاء کی جانب سے دھرنے پر موقف جاری

سندھ پولیس نے حیدرآباد میں وکلاء کی جانب سے دھرنے کے حوالے سے اپنا موقف جاری کر دیا ہے۔

پولیس نے ایک اعلامیہ میں کہا ہے کہ سندھ بھر میں دہشت گردی کے خدشات کے پیش نظر پولیس کی کاروائیاں جاری ہیں، اور اس ضمن میں فینسی نمبر پلیٹس، ہوٹرز، پولیس لائٹس اور کالے شیشوں والی گاڑیوں کے خلاف مہم بھی جاری ہے۔ 3 فروری کو حیدرآباد کے بھٹائی نگر تھانے کی حدود میں پولیس نے مہران کار کو روکا جس میں سبز رنگ کی نمبر پلیٹ اور ٹنٹڈ گلاسز تھے۔

پولیس نے قانون کے مطابق کارروائی کی تاہم وکلاء کو اس پر تحفظات تھے، اور انہوں نے ایس ایس پی حیدرآباد کے آفس میں توڑ پھوڑ کی۔ وکلاء سے مذاکرات کیے گئے، تاہم انہوں نے ایس ایس پی حیدرآباد کے ٹرانسفر کی شرط رکھی۔اس کے بعد وکلاء نے حیدرآباد بائی پاس پر پہنچ کر سڑک کو بلاک کر دیا، جس سے عوام کو شدید پریشانی کا سامنا کرنا پڑا۔

سندھ پولیس نے اس واقعہ کی جوڈیشل انکوائری کی پیش کش کی ہے، جس کے تحت ڈسٹرکٹ سیشن جج حیدرآباد کی نگرانی میں بار کا نمائندہ اور سینئر پولیس افسر شامل ہوں گے۔

جوڈیشل انکوائری میں اس بات کا تعین کیا جائے گا کہ کارروائی کہاں خلاف قانون ہوئی تاکہ اس کے مطابق مزید کارروائی کی جا سکے۔