اردو ادب کے ممتاز شاعراور ادیب صوفی غلام مصطفیٰ تبسم کی  47 ویں برسی آج منائی گئی

لاہور:اردو ادب کے ممتاز شاعر اور ادیب صوفی غلام مصطفیٰ تبسم کی 47ویں برسی آج منائی گئی۔
غلام مصطفی تبسم 4 اگست 1899ء کو امرتسر میں پیدا ہوئے ،صوفی غلام مصطفیٰ تبسم کا شمار اردو ادب کے اہم ترین شخصیات میں ہوتا ہے، خصوصاً بچوں کے ادب میں ان کی تخلیقات نے زبردست مقبولیت حاصل کی ۔ 
صوفی غلام مصطفیٰ تبسم کا تخلیق کردہ کردار "ٹوٹ بٹوٹ" آج بھی بچوں کے ذہنوں میں تازہ ہے، اور ان کی نظموں نے بچوں کو علم و عمل کی طرف راغب کیا۔ انہوں نے بچوں کو نہ صرف تفریح فراہم کی بلکہ ان کی تربیت بھی کی۔
صوفی غلام مصطفیٰ تبسم نے اعلیٰ تعلیم کے بعد تدریس کے شعبے میں قدم رکھا اور لاہور کے تعلیمی اداروں سے وابستہ رہے۔ 
ریٹائرمنٹ کے بعد انہوںنے خانہ فرہنگ ایران کے ڈائریکٹر، "لیل و نہار" کے مدیر اور کئی دیگر اداروں میں اہم عہدوں پر ذمہ داریاں سنبھالی اور بخوبی ادا کیں۔
حکومت پاکستان کی جانب سےصوفی غلام مصطفی تبسم کو ان کی ادبی خدمات کے اعتراف میںصدارتی تمغہ برائے حسن کارکردگی اور ستارہ امتیاز سے نوازاگیا، جبکہ ایرانی حکومت نے بھی انہیں نشان سپاس عطا کیا۔
اردو ادب کا یہ روشن ستارہ 7 فروری 1978ء کو ہمیشہ کے لئے ڈوب گیا، صوفی غلام مصطفیٰ تبسم لاہور کے میانی صاحب قبرستان میں آسودہ خاک ہیں۔