اداکاری میں دلچسپی نہیں تھی، حادثاتی طور پر اداکارہ بنیں، نندیتا داس

لاہور:بھارت کی نامور اداکارہ، ہدایت کارہاورپروڈیوسر و لکھاری نندیتا داس نے انکشاف کیا ہے کہ انہیں اداکاری میں دلچسپی نہیں تھی، وہ حادثاتی طور پر اداکارہ بنیں۔
لاہور میں منعقدہ فیض فیسٹیول میں ایک سیشن نے خطاب کرتے ہوئے اداکارہ نندیتا داس نے بتایا کہ انہیں اداکاری اور بطور لکھاری سے زیادہ ہدایت کاری کرنے میں مزہ آتا ہے، کیوں کہ ہدایت کاری میں تمام چیزوں کی جھلک نظر آتی ہے۔
سیشن سے خطاب کرتے ہوئےاداکارہ نندیتا داس نے اپنے کیریئر کے متعلق کھل کربات کی ، انہوں نے کہا کہ ان کا تعلق روشن خیال گھرانے سے تھا، سوشیالوجی میں ماسٹر کی ڈگری حاصل کرنے کے بعد انہوں نے مسائل کی نشاندہی کے لیے اسٹریٹ تھیٹر میں کام کیا لیکن انہیں اداکاری کرنے کا کوئی جنون نہیں تھا۔
انہوں نے کہا کہ وہ مسائل کو سمجھانے اور سامنے لانا چاہتی تھیں، پھر انہیں ’فائر‘ فلم میں کام کی پیش کش ہوئی، انہوں نے کہانی پڑھ کر اس میں کام کا فیصلہ کیا، انہیں بالکل بھی اداکاری کا شوق نہیں تھا لیکن اس باوجود ’فائر‘ کی کامیابی کے بعد وہ مسلسل کام کرتی رہیں اور 40 فلموں میں کام کرلیا۔
نندیتا داس نے ’ارتھ‘ اور ’فائر‘ سمیت دیگر فلموں کی اچھی فلمیں قرار دیتے ہوئے کہا کہ وہ کسی بھی فلم میں کام کرنے کے لیے کردار کو نہیں دیکھتیں، ان کا کہنا تھا کہ وہ کسی بھی فلم میں کہانی کی بنیاد پر کام کرنے کو تیار ہوجاتی ہیں، پھر وہ ہدایت کار کو بھی دیکھتی ہیں کہ وہ کہانی کے ساتھ انصاف کرپائیں گے یا نہیں؟
خیال رہے کہ بھارتی اداکارہنندیتا داس لاہور میں ہونے والے فیض احمدفیض فیسٹیول میں شرکت کے لیے پاکستان پہنچیں تھیں ، جبکہ اس  اس سے قبل بھی پاکستان آ چکی ہیں، انہوں نے فیض فیسٹیول میں شرکت کے لیے لاہور آنے پر خوشی کا اظہار کرتے ہوئے اپنی انسٹاگرام پوسٹ میں بتایا کہ وہ 5 سال بعد پاکستان جا رہی ہیں۔
اس دوران میڈیا سے گفتگو کرتے ہوئے نندیتا داس کا کہنا تھا کہ ’انہیں صرف پاکستان آنے کے لیے بہانے چاہیے ہوتے ہیں‘ اور وہ بہانا بنا کر آجایا کرتی ہیں۔
واضح رہے کہ نندیتا داس پہلی بار 1996 میں پاکستان آئی تھیں، اس کے بعد بھی وہ متعدد ادبی فیسٹیولز میں شرکت کے لیے پاکستان آتی رہی ہیں، انہیں ان کی فلموں اور مختلف کرداروں کی وجہ سے پاکستان میں بھی کافی پسند کیا جاتا ہے۔