غزہ سیز فائر کا اختتام، اسرائیل نے غزہ کیلئے امداد ی سامان کی ترسیل روک دی

غزہ: ماہ رمضان میں بھی فلسطینیوں پراسرائیل کی جارحیت جاری ہے،غزہ جنگ معاہدے کے ختم ہوتے ہی صہیونی ریاست نے غزہ میں امدادی سامان کی ترسیل روک دی۔
غیر ملکی میڈیا کے مطابق اسرائیلی وزیراعظم بنیامن نیتن یاہو کے آفس سے جاری کیے گئے بیان میں کہا گیا کہ جنگ بندی کے پہلے مرحلے کے اختتام اور حماس کی جانب سے بامقصد بات چیت کو جاری رکھنے سے انکار کے بعد 2 مارچ سے اسرائیل نے غزہ کو امداد کی سپلائی مکمل طور پر روکنے کا فیصلہ کیا۔
یاد رہے کہ گزشتہ روز جنگ بندی کے پہلے مرحلے کی مدت ختم ہونے پر اسرائیل نے جنگ بندی میں عارضی توسیع کا اعلان کیا تھا،توسیع کی تجویز امریکا کی جانب سے دی گئی تھی مگر اب اسرائیل نے یوٹرن لیتے ہوئے امداد کو مکمل طور پر روک دیا ہے۔
دوسری جانب حماس نے جنگ بندی کا دوسرا مرحلہ شروع کرنے پر زور دیا ہے،حماس کی جانب سے جاری بیان میں کہا گیا کہ غزہ کے لیے امداد کی فراہمی روکنا سستی بلیک میلنگ  ہے۔
حماس نےاپنے بیان میں مزید کہاکہ خطے میں استحکام اور قیدیوں کی واپسی کا واحد راستہ معاہدے پر عمل درآمد ہے، اسرائیلی اقدام جنگی جرم اور معاہدے کی واضح خلاف ورزی ہے۔