بھارتی اداکارہ رانیا راؤ ساڑھے 14 کلو سونا اسمگل کرنے پر گرفتار

فلمی انداز میں متحدہ عرب امارات (یو اے ای) کی ریاست دبئی سےکروڑوں روپےمالیت کا سونا بھارت اسمگل کرنے والی 31 سالہ بھارتی اداکارہ رانیا راؤ کو گرفتار کرلیا گیا۔

رپورٹ کےمطابق اداکارہ نے فلمی انداز میں کپڑوں اور جسم کے ساتھ سونے کے بسکٹس کو اس طرح چپکایا ہوا تھا کہ اسےتلاش کرنامشکل تھا، تاہم ایئرپورٹ پر حکام نے انہیں بڑی ہوشیاری سے پکڑ لیا ، اداکارہ کوڈائریکٹوریٹ آف ریوینیو انٹیلی جنس (ڈی آر آئی) کے حکام نے گرفتار کرنے کے بعد عدالت میں پیش کیا اور بعد ازاں انہیں 14 روزہ عدالتی ریمانڈ پر جیل بھیج دیا گیا۔

رانیا راؤ کو چار مارچ کو بنگلورو ایئرپورٹ سے ساڑھے 14 کلو سونا جو کہ بھارتی 13 کروڑ روپے کا بنتا ہے،اسمگل کرتے ہوئے گرفتار کیا گیا ، ڈی آر آئی حکام نےاداکارہ کی رہائش گاہ پربھی چھاپہ مارکر سونے سمیت خطیر نقد رقم کو برآمد کرلیا جب کہ حکام نے تفتیش کا دائرہ بڑھا دیا۔

رانیا راؤ ریاست کرناٹک کے ڈائریکٹر جنرل آف پولیس (ڈی جی پی) رام چندر راؤ کی بیٹی ہیں، جنہوں نےمذکورہ واقعے کے بعد بیٹی سے اظہار لا تعلقی کردیا ہے۔ 

انہوں نےواضح کیا کہ اگران کی سوتیلی بیٹی غلط کام میں ملوث پائی گئیں تو ان کے خلاف قانونی کارروائی ہوگی۔

رانیا راؤ نے 2014 میں کنڑ زبان کی فلموں سےکیریئر کا آغاز کیا تھا اوربعد ازاں انہوں نےتامل فلموں میں بھی کام کیا اور ان کا شمار جنوبی بھارتی فلم انڈسٹری کی ابھرتی اداکاراؤں میں ہوتا ہے۔

اداکارہ کے والد کا کہنا تھا کہ رانیاراؤ نےچار ماہ قبل بنگلورو کےایک کاروباری شخص سے شادی کرلی تھی، اس کے بعد ان کا ملنا جلناکم ہوچکا ہےاورانہیں بیٹی اوران کےشوہرکےکاروبارسےمتعلق کوئی معلومات نہیں۔

رانیا راؤ نے چند بڑے بجٹ کی فلموں اورمقبول ہیروز کےساتھ بھی مرکزی کردار ادا کیے، تاہم کچھ عرصےسے وہ فلم انڈسٹری سے دور تھیں اور چند ماہ قبل انہوں نےشادی کرلی تھی۔

رانیا راؤ کے تواتر سے دبئی اور بھارت کےدوروں کےبعد حکام کو ان پرشک ہوا اوران کی کڑی نگرانی کرکےانہیں سونا اسمگل کرنے کرتےہوئے گرفتار کیا گیا ، دوران سماعت ڈائریکٹوریٹ آف ریونیو انٹیلی جنس (ڈی آر آئی) نے عدالت سے درخواست کی کہ رانیا راؤ سے مزید تفتیش کی ضرورت ہے کہ انہوں نے کس طرح سیکیورٹی کے تمام پروٹوکول توڑے اور کیسے اتنی بھاری مقدار کا سونا اسمگل کیا۔

ڈی آر آئی نے عدالت کے روبرو انکشاف کیا کہ اداکارہ نے رواں سال کے دوران دبئی کے 27 دورے کیے ہیں جس کی وجہ سے ان پر خطیر مالیت کے سونے کی اسمگلنگ کے شبے کو تقویت پہنچتی ہے۔