یوکرینی صدر زیلنسکی نے تلخ کلامی پر ٹرمپ سے معافی مانگ لی

واشنگٹن: یوکرین کے صدر ولادیمیر زیلنسکی کی وائٹ ہاؤس میںامریکی صدر کے ساتھ ہونے والی تلخ کلامی پر ڈونلڈ ٹرمپ سے معافی کے حوالے سے بڑا دعویٰ سامنے آ گیا ہے۔
 امریکی میڈیا کے مطابق صدر ڈونلڈ ٹرمپ کے خصوصی ایلچی سٹیو وٹکوف نے دعویٰ کیا ہے کہ یوکرینی صدر ولودیمیر زیلنسکی نے اوول آفس میں ہونیوالی تلخ کلامی پر صدر ٹرمپ سے معافی مانگ لی ہے۔
سٹیو وٹکوف نے امریکی میڈیا کو دیئے گئے ایک انٹرویو میں بتایا کہ زیلنسکی نے ڈونلڈ ٹرمپ کو خط بھیج کر معذرت کی جس میں انہوں نے وائٹ ہاؤس میں پیش آئے واقعے پر افسوس کا اظہار کیا۔
یوکرینی صدر کی معذرت کے بعد امریکی خصوصی مندوب سٹیو وٹکوف جلد ماسکو کا دورہ کریں گے جہاں وہ روسی صدر ولادیمیر پیوٹن سے ملاقات کریں گے تاہم ابھی اس دورے کی حتمی تاریخ کا اعلان تک نہیں کیا گیا۔
خیال رہے کہ چند روز قبل اوول آفس وائٹ ہاؤس میںامریکی صدر ڈونلڈ ٹرمپ اور زیلنسکی کے درمیان ہونے والی ملاقات میں تلخ جملوں کے تبادلہ ہوا تھا ،جس کے بعد ناراض ہو کر ٹرمپ نے زیلنسکی کو وائٹ ہاؤس سے نکل جانے کا کہہ دیا تھا اور بیان دیا تھا کہ زیلنسکی امن کے لیے تیار نہیں، جب وہ تیار ہوں گے تب ہی وہ واپس آ سکتے ہیں۔
اس واقعے کے بعد زیلنسکی نے پہلے معافی مانگنے سے انکار کر دیا تھا اور کہا تھا کہ جو کچھ وائٹ ہاؤس میں ہوا وہ اچھا نہیں تھا اور وہ دوبارہ وہاں جانے کا ارادہ نہیں رکھتے، تاہم، اب زیلنسکی کی معذرت سے امریکا اور یوکرین کے تعلقات میں نئی پیشرفت کے امکانات پیدا ہو گئے ہیں۔