مسلم لیگ نے پاکستان بنایا اور مسلم لیگ ہی اس کو سنوار رہی ہے،عظمی بخاری

لاہور: صوبائی وزیر اطلاعات پنجاب عظمی بخاری نے کہا ہے کہ مسلم لیگ نے پاکستان بنایا اور مسلم لیگ ہی اس کو سنوار رہی ہے۔
صوبائی دارالحکومت لاہور میں وزیر اطلاعات پنجاب عظمیٰ بخاری نےیوم پاکستان کی مناسبت سے گفتگو کرتے ہوئے کہا کہ یوم پاکستان ایک نئی سوچ، نئے حوصلے اور نئے جذبے کا نام ہے، جبکہ 23 مارچ ہمیں دنیا میں منفرد اور عظیم قوم بننے کی یاد دلاتا ہے۔
میڈیا سے گفتگو میں انہوں نےمزید کہا کہ مسلم لیگ نے پاکستان بنایا اور مسلم لیگ ہی اس کو سنوار رہی ہے۔ پاکستان آج نواز شریف کی قیادت میں ترقی کی منازل طے کر رہا ہے۔ اور پاکستان اسلامی دنیا کی واحد ایٹمی قوت ہے۔
عظمیٰ بخاری کا کہنا تھا کہ عالم اسلام میں پاکستان اپنی منفرد اور الگ پہچان رکھتا ہے،پاکستان آگے بڑھنے کے لیے بنا تھا اور اس نے آگے ہی بڑھنا ہے۔ ہم نے تمام سازشوں کا قلع قمع کرتے ہوئے خوشحالی کا سفر طے کرنا ہے۔
صوبائی وزیرنے کہا کہ ملکی سلامتی اور دفاع کے لیے افواج پاکستان کی ناقابل فراموش خدمات ہیں۔ اور ملک کے لیے اپنی جانوں کا نذرانہ پیش کرنے والے شہدا قوم کے ماتھے کا جومر ہیں۔