حضرت شاہ حسین کاسالانہ عرس،لاہورمیں کل عام تعطیل ہوگی،نوٹیفکیشن جاری

لاہور:حضرت شاہ حسین المعروف مادھو لال حسین کے سالانہ عرس کے سلسلے میں کل لاہورمیں عام تعطیل ہوگی۔
اس حوالے سےمحکمہ سروسز اینڈ جنرل ایڈمنسٹریشن کی جانب سے تعطیل کا نوٹیفکیشن جاری کر دیاگیا ہے۔
جاری کردہ نوٹیفکیشن کے مطابق لاہور ضلع کی تمام سرکاری دفاتر اور ادارے اس روز بند رہیں گے تاکہ شہری روایتی تقریبات میں آسانی سے شرکت کر سکیں۔
نوٹیفکیشن میں واضح کیا گیا کہ یہ تعطیل صرف لاہور ضلع میں لاگو ہو گی اور تمام ذیلی دفاتر بھی اس میں شامل ہوں گے، تاہم پنجاب سول سیکرٹریٹ، اس سے منسلک محکمے اور علاقائی دفاتر تعطیل سے مستثنیٰ ہوں گے۔
میلہ 11 سے 14 اپریل تک مادھو لال حسین کے دربار اور شالیمار باغ میں منعقد ہو گا،4روزہ میلے میں دن اور رات کے اوقات میں مختلف تقریبات کا انعقاد کیا جائے گا۔
میلے میں شاہ حسین کی تعلیمات پر مبنی پینل ڈسکشنز، لیکچرز اور پنجابی مشاعرہ ہو گا،محفل سماع، ہیر گوئی کے علاوہ کھانوں کے اسٹالز اور دستکاری کا بازار سجایا جائے گا۔
تاریخی طور پر مشہور الاؤ بھی روشن کیا جائے گا، جہاں عقیدت مند چراغاں کریں گے۔