پنجاب کے کئی علاقوں میں شدید موسمی صورتحال سے متعلق الرٹ جاری

نیشنل ایمرجنسی آپریشن سینٹر (NEOC) کی جانب سے پنجاب کے کئی علاقوں میں جمعے اور ہفتے کو کو شدید بارش، ژالہ باری اور آندھی طوفان کے پیشٰ نظر الرٹ جاری کر دیا گیا ہے۔ عوام، کسانوں اور متعلقہ اداروں کو خبردار کیا گیا ہے کہ وہ ممکنہ موسمی خطرات سے نمٹنے کے لیے احتیاطی تدابیر اختیار کریں۔

ترجمان این ڈی ایم اے کے مطابق اسلام آباد، راولپنڈی، اور پنجاب کے کئی اضلاع بشمول اٹک، چکوال، گجرات، جہلم میں آندھی طوفان اور ژالہ باری کا خدشہ ہے۔ اسی طرح فیصل آباد، حافظ آباد، جھنگ، خوشاب، میانوالی، لاہور، نارووال، ساہیوال، سرگودھا اور شیخوپورہ میں بھی شدید موسمی صورت حال کا سامنا ہو سکتا ہے۔

این ای او سی نے شہریوں سے گزارش کی ہے کہ وہ اس دورانں غیر ضروری سفر سے گریز کریں اور آندھی و طوفان کے دوران کمزور عمارتوں، کھمبوں اور درختوں کے نیچے پناہ نہ لیں۔

 عوام سے درخواست کی گئی ہے کہ وہ موسمی صورتحال سے بروقت آگاہی کے لیے NDMA کی موبائل ایپ “ڈیزاسٹر الرٹ” کو فالو کریں تاکہ کسی بھی ہنگامی صورتحال سے بچاؤ ممکن ہو سکے۔

تیز ہواؤں اور موسلا دھار بارش کے باعث بجلی کی بندش اور حادثات کا اندیشہ ہے۔ اس کے ساتھ ساتھ کھڑی فصلوں کو شدید نقصان پہنچنے کا بھی اندیشہ ہے، جس پر کسانوں کو پیشگی حفاظتی اقدامات کرنے کی ہدایت کی گئی ہے۔