الحمرا آرٹس کونسل میں گلوکاروں کاعظیم موسیقار ایم اشرف کوان کے گیت گا کر خراج تحسین

لاہور:الحمرا آرٹس کونسل لاہور میں عظیم موسیقار ایم اشرف کو گلوکاروں نے ان کے گیت گا کر خراج تحسین پیش کیا۔
اس حوالے سے الحمرا آرٹس کونسل لاہور میں ایک شاندار تقریب کا انعقاد کیا گیا جس میںفلم انڈسٹری سے وابستہ شخصیات کے علاؤہ فن موسیقی کے دلدادہ افراد نے شرکت کی ۔
تقریب میں سینئر اداکار خالد عباس ڈار، سید نور،شہزاد رفیق،صفدر ملک، عدزا جہاں، ترنم ناز،انور رفیع، شاہدہ منی،سائرہ نسیم،حمیرا چنا،ایم ارشد  اور  دیگر شامل تھے۔ شرکاء نے موسیقار ایم اشرف کے فن، شخصیت اور ان کے ساتھ گزاری یادوں کو تازہ کیا۔
اس موقع پر ایگزیکٹوڈائریکٹر الحمراء توقیر حیدر کاظمی نے ایم اشرف کو خراج عقیدت پیش کیا اور کہا کہ ایم اشرف فقید المثال خراج عقیدت کے مستحق ہیں، وہ اپنی ذات میں نہایت شفیق ومہربان انسان تھے، انہوں نے فلموں کو یاد گار موسیقی دی جو تاریخ میں امر ہوئیں،ان کے کمپوز کئے ہوئے گانے ہر زبان زدعام ہیں۔توقیر حیدر کاظمی نے مزید کہا کہ الحمراء اپنے ایسے لیجنڈز کی ہر ماہ ایک تقریب منائے گا،انہوں نے انور رفیع اور شازیہ علی کو شاندار تقریب منعقد کرنے پر مبارکباد دی۔

گلوکارہ ترنم ناز، حمیرا چنا، عذرا جہاں، شاہدہ منی، سائرہ نسیم،انور رفیع، امیر علی،امانت علی،فاروق شاد، نایاب علی خان،جوہر علی خان،رخشان انور نے شاندار پرفارم کیا۔
تقریب میں ایم اشرف کے کیئریر پر مبنی ڈاکومنٹری بھی دیکھائی گئی۔تقریب کی میزبانی کے فرائض اعجاز بخار ی اور شازیہ علی نے انجام دئیے۔