ایران: بندرگاہ پر دھماکوں سے  ہلاکتوں کی تعداد 40 ہو گئی ، قومی سوگ کا اعلان

بندر عباس:ایران کے شہر بندرعباس کی شہید رجائی پورٹ پر دھماکے میں جاں بحق افراد کی تعداد بڑھ کر 40 ہو گئی جبکہ 1200 سے زائد زخمی ہیں۔
ایرانی میڈیا کے مطابق وزارت دفاع نے پورٹ پر فوجی سازو سامان کی موجودگی کی بین الاقوامی میڈیا کی خبروں کو مسترد کر دیا ہے۔
دوسری جانب ایرانی سپریم لیڈر آیت اللہ خامنہ ای نے دھماکے کی مکمل چھان بین کا حکم دیتے ہوئے کسی بھی کوتاہی یا ارادی عمل کو بے نقاب کرکے ضابطے کے مطابق کارروائی کرنے کی ہدایت کی ہے۔
ایرانی میڈیا نے مزید بتایا کہ خامنہ ای نے غفلت یا دانستہ اقدام کی نشاندہی پر سخت کارروائی کا حکم دے دیا، ایرانی صدر جائے حادثے کا جائزہ لینے کیلئے بندر عباس پہنچ گئے، دھماکہ بندرگاہ کی گیس ٹینک تنصیب میں ہوا تھا۔
ایرانی میڈیا کے مطابق دھماکے کے 30 گھنٹے گزرنے کے بعد بندرگاہ کے کچھ حصوں میں دوبارہ آگ بھڑک اٹھی، ایرانی حکومت نے بندرگاہ دھماکے کے بعد قومی سوگ کا اعلان کر دیا۔
ایرانی حکام کے مطابق کنٹینرز میں آتش گیر مواد کو ذخیرہ کرنے میں غفلت برتی گئی۔
بندرگاہ پر دھماکوں کے بعد روس نے ایران کو مدد کی پیشکش کرتے ہوئے روسی طیارے ایران بھیج دیئے ہیں۔