ڈاکٹر لبنیٰ ظہیر اور سید نور کا تھلیسیمیا کی آگہی کے لیے نور فاؤنڈیشن کا دورہ

لاہور:یونیورسٹی آف دی پنجاب کے فلم اینڈ براڈکاسٹنگ ڈیپارٹمنٹ کی چیئرپرسن، پروفیسر ڈاکٹر لبنیٰ ظہیر نے معروف فلم ڈائریکٹر سید نور کے ہمراہ نور فاؤنڈیشن کا دورہ کیا، جہاں انہوں نے ورلڈ تھلیسیمیا ڈے کے موقع پر بچوں سے ملاقات کی اور آگاہی مہم میں حصہ لیا۔ 
یہ تقریب ہمدردی، شعور اور بیماری کے خلاف مشترکہ جدوجہد کا بھرپور اظہار بنی۔اپنے دورے کے دوران، ڈاکٹر لبنیٰ ظہیر نے تھلیسیمیا کے علاج کے مراحل سے گزرنے والے بچوں سے ملاقات کی اور مختلف کمپنیوں کی جانب سے فراہم کردہ تحائف اور پیزا باکسز تقسیم کیے، جنہوں نے بچوں کے چہروں پر خوشیاں بکھیر دیں۔

 انہوں نے اس موقع پر منعقدہ آگاہی واک میں بھی حصہ لیا،اس موقع پر معروف ریڈیو براڈکاسٹر احمد شیخ اور ٹی وی اینکر ڈاکٹر محمود سمیت میڈیا سے تعلق رکھنے والی دیگر شخصیات نے بھی شرکت کی، جنہوں نے صحت عامہ کے فروغ میں عوامی شمولیت کی اہمیت پر زور دیا۔

تقریب سے خطاب کرتے ہوئے، ڈاکٹر لبنیٰ ظہیر نے زور دیا کہ تھلیسیمیا سے بچاؤ کے لیے شادی سے قبل اسکریننگ کو قانوناً لازم قرار دیا جائے۔ انہوں نے کہا، "صرف شعور اجاگر کرنا کافی نہیں، اب وقت ہے کہ اسے پالیسی میں تبدیل کیا جائے تاکہ اس موروثی بیماری کے پھیلاؤ کو روکا جا سکے۔
انہوں نے ڈاکٹر بشیر اور نور فاؤنڈیشن کی ٹیم کی خدمات کو بھی سراہا، جنہوں نے اس نیک مشن کو مسلسل جاری رکھا ہوا ہے۔