فلم ٹی وی اسٹیج کے بے مثل اداکار طلعت حسین کو مداحوں سے بچھڑے ایک سال ہو گیا

ویب ڈیسک: فلم ٹی وی اسٹیج کے بے مثل اداکار ، منفرد صدا کار،پرفامنگ آرٹس کےاستاد طلعت حسین کی آج پہلی برسی منائی جارہی ہے۔
اداکار طلعت حسین نے پانچ دہائیوں تک فن اداکاری کی آبیاری کی ، انہیں پرائڈ آف پرفارمنس سمیت کئی اعزازات سے نوازا گیا ،ان کے نام کا سکہ پانج دہائیوں تک شوبزکی دنیا میں پوری آب و تاب کے ساتھ چلتا رہا، نہ صرف ملک بلکہ بین الاقوامی سطح پر ان کے ہنر کا اعتراف کیا گیا ۔
انہوں نے لندن سے فن اداکاری میں مہارت کی ڈگری گولڈ میڈل کے ساتھ حاصل کی ۔
طلعت حسین 1967میںپاکستان ٹیلی ویژن( پی ٹی وی) پرجلوہ گرہوئے ، ان کے ڈراموں بندش، کارواں، ہوائیں، کشکول اور پرچھائیاں کو زبردست پذیرائی ملی ،اس کے علاوہ انہوں نے چینل فور لندن کے ڈرامہ سیریل ٹریفک اورفیملی پرائڈ میں بھی اداکاری کے جوہر دکھائے ۔
 ان کی مقبول فلموں میں چراغ جلتارہا، گمنام، باغی، ایکٹر ان لاء ، بھارتی فلم سوتن کی بیٹی ، بانی پاکستان پر بننےوالی بین الاقوامی فلم جناح اورنارویجن فلم امپورٹ ایکسپورٹ شامل ہے ۔
صداکاری کی دنیا میں طلعت حسین کی منفرد آواز کا الگ ہی جادو تھا،انہوں نے کئی ڈاکومنٹریز ، اشتہاروں کے لیے اپنی آواز دی ،اس کے علاوہ انہوںنے قرآن مجید کا ترجمہ بھی ریکارڈ کرایا ، وہ نیشنل اکیڈمی آف پرفارمنگ آرٹس میں درس و تدریس سے منسلک رہے ۔
اداکار طلعت حسین کوپرائیڈ آف پرفارمنس ، ستارہ امتیاز ، نیشنل فلم ایوارڈ ، نگارڈ ایوارڈسمیت کئی ملکی اور غیر ملکی اعزازات سے سرفراز کیا گیا ۔ وہ گزشتہ سال طویل علالت کے بعدچوراسی برس کی عمر میں انتقال کرگئے لیکن فن کی دنیا میں ان کا نام زندہ رہے گا ۔