کراچی کے علاقے ڈیفنس میں نوجوان کو تشدد کا نشانہ بنانے والے بااثر شخص کیخلاف مقدمہ درج

کراچی: روشنیوں کے شہر کراچی کے پوش علاقے ڈیفنس میں کار اور موٹر سائیکل میں تصادم کے بعد کار سوار بااثر شخص آپے سے باہر ہوگیا اور نوجوان کو اس کی بہنوں کے سامنے تشدد کا نشانہ بنایا۔

 واقعے کی فوٹیج وائرل ہونے کے بعد پولیس بھی ایکشن میں آگئی، پولیس نے واقعے کا مقدمہ درج کرکے بااثر شخص کے سیکیورٹی گارڈ، ڈرائیور اور گھریلو ملازم کو حراست میں لے لیا اور ایک گاڑی بھی تحویل میں لے لی ہے۔

وائرل ہونے والی ویڈیو میں دیکھا جا سکتا ہیے کہ نوجوان کے ساتھ موجود اس کی بہن بااثر شخص کے سامنے ہاتھ جوڑ جوڑ کر معافیاں مانگتی رہی لیکن روتی لڑکیوں کے آنسووں پر بھی بااثر شخص کو ترس نہ آیا۔

متاثرہ شہری کی بہنیں ڈیفنس میں ہی قریبی سیلون میں کام کرتی ہیں جنہیں روزانہ کی بنیاد پر متاثرہ شہری لینے آتا ہے۔

عینی شاہد نے بتایا کہ واقعہ اتوار کی رات 8 بجے کے قریب پیش آیا، نوجوان کی موٹرسائیکل ہلکی سی سیٹھ کی گاڑی سے ٹچ ہوگئی تھی جس پر سیٹھ نے مارا۔

عینی شاہد نے بتایا کہ لڑکے کا پتا نہیں لڑکی قریبی سیلون میں کام کرتی ہے، عینی شاہدین کے مطابق ملزم نے سرکاری ملازم ہونے کا دعویٰ کیا تھا۔
دوسری جانب ایس ایس پی ساؤتھ مہروز علی نے بتایا کہ فوٹیج میں تشدد کرنے والے با اثر شخص کی شناخت سلمان فاروقی کے نام سے ہوئی ہے، سلمان فاروقی اور اس کے گارڈ نے شہری پر تشدد کرکے قانون کو ہاتھ میں لیا۔

ذرائع کا کہنا ہے کہ شہری پر تشدد کرنے والا شخص سلمان فاروقی بائیونک فلمز نامی اشتہاری کمپنی کا سی ای او ہے۔