کرپشن کےخاتمے کیلئے تمام اداروں کی کاوشیں قابل تحسین ہیں،شہباز شریف

اسلام آباد:وزیر اعظم شہباز شریف نے کہا ہے کہ کرپشن کےخاتمے کیلئے تمام اداروں کی کاوشیں قابل تحسین ہیں،حالیہ مثبت معاشی اشاریے حکومتی پالیسیوں کی درست سمت کا منہ بولتا ثبوت ہیں۔ 

تفصیلات کےمطابق ایف بی آر امور سے متعلق جائزہ اجلاس میں شہباز شریف نے گفتگو کرتے ہوئے کہا کہ پاکستان کو ایک مستحکم عالمی معیشت بنانے کی جدوجہد میں کامیاب ہونے کےلیے حکومت پُرعزم ہے۔

 اجلاس سے خطاب کرتے ہوئے وزیر اعظم نے کہا کہ تمام شعبوں میں ادارہ جاتی اصلاحات تیزی سے جاری ہیں، ملکی اداروں سے کرپشن کے خاتمے اور شفافیت کی عدم موجودگی جیسی دیگر خامیوں کو دور کرنے کےلیے محنت کر رہے ہیں۔

 
انہوں نے کہا کہ کرپشن کےخاتمے کیلئے تمام اداروں کی کاوشیں قابل تحسین ہیں، مثبت معاشی اشارئے حکومتی پالیسی کی درست سمت کا منہ بولتا ثبوت ہیں۔

وزیراعظم نے فیس لیس کسٹمز اسسمنٹ سسٹم کی حالیہ کارکردگی پر اطمینان کا اظہار کرتے ہوئے کہا کہ فیس لیس اسسمنٹ سسٹم جیسی اصلاحات کے حوصلہ افزا نتائج سامنے آرہے ہیں۔ 

شہباز شریف کا کہنا تھا کہ ان شاء اللّٰہ پاکستان کو معاشی طور پر مستحکم بنانے کی اس جدوجہد میں ہم کامیاب ہوں گے۔
 اس کے علاوہ اجلاس میں وزیراعظم نے ایف بی آر اصلاحات کی تھرڈ پارٹی ویلیڈیشن کےلیے عالمی شہرت یافتہ کمپنیوں کی خدمات حاصل کرنے کی ہدایت بھی کی۔

علاوہ ازیں اجلاس میں پاکستان ریونیو آٹومیشن لمیٹڈ میں اصلاحات کی پیشرفت سے متعلق آگاہ کرتے ہوئے کہا کہ فیس لیس کسٹمز اسیسمنٹ سسٹم کے نفاذ سے محصولات میں اضافہ ہوا ہے، پاکستان ریونیو آٹومیشن لمیٹڈ میں اصلاحات کا عمل تیزی سے جاری ہے، عام صارفین کیلئے آسان ڈیجیٹل ٹیکس ریٹرن کا نظام جلد نافذ العمل کیا جائے گا۔

اجلاس میں وفاقی وزیر قانون و انصاف اعظم نذیر تارڑ، وفاقی وزیر اطلاعات و نشریات عطا اللہ تارڑ، چیئرمین ایف بی آر، اور متعلقہ اداروں کے اعلیٰ افسران شریک ہوئے۔