صوبائی وزیر صحت کی زیر صدارت انسداد ڈینگی کے حوالے سے راولپنڈی میں اجلاس

صوبائی وزیر صحت پنجاب خواجہ عمران نذیر کی زیر صدارت انسداد ڈینگی کے حوالے سے راولپنڈی میں اجلاس منعقد ہوا۔

اجلاس میں صوبائی وزیر کو بریفنگ دی گئی کہ ضلع راولپنڈی میں انڈور سرویلنس کے تحت یکم جنوری سے اب تک 3,036,721 گھروں کو چیک کیا گیا جن میں سے 12,452 گھروں میں ڈینگی لاروا کی موجودگی پائی گئی۔

آؤٹ ڈور رپورٹ کے مطابق 725,976 مقامات کو چیک کیا گیا جن میں سے 2885 مقامات پر ڈینگی لاروا ملا۔سال 2025 میں مجموعی طور پر 533 ایف آئی آرز درج کی گئیں، 432 مقامات کو سیل کیا گیا،1784 چالان کیے گئے، اور 1074000روپے کے جرمانے عائد کیے۔

صوبائی وزیر نے کہا کہ تمام سرکاری اداروں سے این او سی لیں کہ وہ ان کے دفتر میں ڈینگی نہیں ہے اور دوران چیکنگ اگر اس دفتر سے لاروہ ملنے کی صورت میں اس دفتر کے خلاف کاروائی ہوگی۔انہوں نے کہا کہ عوام کی جانوں کا تحفظ حکومت کی اولین ترجیح ہے۔

ہر ممکن کوشش کی جائے گی کہ ڈینگی پر قابو پایا جا سکے۔ انہوں نے عوام سے اپیل کی کہ انسداد ڈینگی ٹیموں کے ساتھ مکمل تعاون کریں، اپنے گھروں کی چھتوں کو صاف ستھرا رکھیں اور ان پر فالتو سامان مثلا ٹوٹے ہوئے برتن، پرانے ٹائر وغیرہ جن میں پانی کھڑا ہو فورا ًہٹا دیں اور انسداد ڈینگی مہم کو کامیاب بنانے میں اپنا بھر پور کردار ادا کریں۔