مائیکل جیکسن کو بچھڑے 16 برس بیت گئے، لیکن دھنیں آج بھی زندہ ہیں

پاپ موسیقی کے شہنشاہ اور دنیا بھر کے کروڑوں دلوں پر راج کرنے والے مائیکل جیکسن کو ہم سے بچھڑے آج 16 سال ہو گئے، مگر ان کے نغمے، انداز اور یادیں آج بھی اسی جوش و جذبے سے زندہ ہیں۔

مائیکل جیکسن نے محض پانچ برس کی عمر میں موسیقی کی دنیا میں قدم رکھا، اور 1964 میں اپنے بھائیوں کے ساتھ مل کر "جیکسن فائیو" بینڈ کا حصہ بنے۔ ان کی آواز، منفرد اسٹیج پرسنالٹی اور شاندار ڈانس مووز نے جلد ہی عالمی سطح پر شہرت حاصل کر لی۔

1979 میں انہوں نے اپنا پہلا سولو البم Off the Wall ریلیز کیا، جو زبردست کامیابی سے ہمکنار ہوا۔ تاہم 1982 میں جاری ہونے والا Thriller البم نہ صرف ان کے کیریئر کا سنگِ میل ثابت ہوا، بلکہ موسیقی کی تاریخ کا سب سے زیادہ فروخت ہونے والا البم بھی بن گیا۔ اسی البم نے انہیں عالمی سطح پر "کنگ آف پاپ" کا خطاب دلوایا۔

مائیکل جیکسن کے شہرۂ آفاق گیتوں میں Billie Jean، Beat It، Smooth Criminal، اور Black or White شامل ہیں۔ ان کی اسٹیج پرفارمنس اور خاص طور پر مشہور "مون واک" ڈانس آج بھی نوجوان فنکاروں کے لیے ایک مثالی معیار کی حیثیت رکھتا ہے۔

25 جون 2009 کو ان کی اچانک وفات نے دنیا بھر میں موجود مداحوں کو شدید صدمے سے دوچار کیا۔ لیکن ان کی میوزک لیگیسی آج بھی دلوں پر راج کرتی ہے، اور ان کا فن وقت کی قید سے آزاد ہو چکا ہے۔