محرم الحرام میں فنکار برادری کی جانب سے مجالس اور نذر و نیاز کا اہتمام 

محرم الحرام میں فنکار برادری کی جانب سے مجالس اور نذر و نیاز کا اہتمام کرتے ہوئے شہدائے کربلا کو خراج عقیدت پیش کیا۔

محرم الحرام کا چاند نظر آتے ہی ہر عاشقِ حسینؑ کا دل کربلا کے شہیدوں کی یاد میں غمگین ہو جاتا ہے۔ایسے میں  شوبز سے  وابستہ افراد بھی امام عالی مقام کو نذرانہ عقیدت پیش کرنے میں پیش پیش نظر آتے ہیں۔

فنکار برادری بھی اس ماہ کی مناسبت سے مجالس اور نذو نیاز کا اہتمام کرتی ہے، جہاں شہدائے کربلا کو خراجِ عقیدت پیش کیا جاتا ہے۔ معروف اداکارہ آفریں پری کے گھر بھی مجلس عزا کا اہتمام کیا گیا جبکہ معروف ڈرامہ رائٹر ڈائریکٹر ڈاکٹر اجمل ملک  کی رہائش گاہ پر  نذر و نیاز کا اہتمام کیا گیا۔

اسی طرح اندرون شہر ٹیکسالی گیٹ سے بھی جلوس نکالے گئے اور مجالس کا انعقاد کیا گیا۔ شاہ نور اسٹوڈیو سے ملکہ ترنم نو ر جہاں کے گھر سے قدیمی ذوالجناح کا جلوس نکالا گیا۔

 معروف فلم ڈائریکٹر جرار رضوی کی رہائش  گاہ پر نذو نیاز کا اہتمام کیا گیا جبکہ ماضی کی معروف اداکارہ دردانہ رحمان کی رہائش گاہ پر بھی سالانہ مجلس عزا کا اہتمام کیا گیا۔

محرم الحرام میں پوری امت مسلمہ غمِ حسینؑ میں سوگوار دکھائی دیتی ہے۔ان عظیم ہستیوں کو یاد کیا جاتا ہے جنہوں نے دین اسلام کی سربلندی کے لیے میدانِ کربلا میں اپنی جانوں کا نذرانہ پیش کیا