یمن حوثیوں کا اسرائیل پر بیلسٹک میزائل حملہ، صہیونی فوج کا ناکام بنانے کا دعویٰ

یمن کے حوثی گروہ نے فلسطینیوں سے اظہارِ یکجہتی کے طور پر اسرائیل پر بیلسٹک میزائل حملہ کیا ہے، جسے اسرائیلی فوج نے دورانِ پرواز تباہ کرنے کا دعویٰ کیا ہے۔

رائٹرز کے مطابق، اتوار کی صبح یمن سے داغا گیا میزائل اسرائیل کی فضائی حدود میں داخل ہونے سے پہلے ہی روک لیا گیا۔ واقعے کے دوران اسرائیل کے مختلف شہروں میں خطرے کے سائرن بجائے گئے، جس سے شہریوں میں خوف و ہراس پھیل گیا۔

کچھ دیر بعد ایران نواز حوثی گروہ نے حملے کی ذمہ داری قبول کرتے ہوئے دعویٰ کیا کہ انہوں نے وسطی اسرائیل کے ساحلی شہر یافا کو نشانہ بنانے کی کوشش کی تھی۔ ان کا کہنا تھا کہ یہ کارروائی غزہ میں جاری اسرائیلی مظالم کے خلاف احتجاج کا ایک حصہ ہے اور وہ فلسطینی عوام کی حمایت جاری رکھیں گے۔

اسرائیلی ردعمل اور ممکنہ جوابی اقدامات

اسرائیلی حکام نے حوثیوں کو سخت نتائج کی وارننگ دیتے ہوئے کہا ہے کہ اگر یمن سے حملے جاری رہے تو بحری و فضائی ناکہ بندی نافذ کی جا سکتی ہے۔ اسرائیل اس سے قبل بھی حوثی تنصیبات پر فضائی کارروائیاں کر چکا ہے۔

اکتوبر 2023 میں غزہ پر جنگ کے آغاز کے بعد سے حوثیوں نے اسرائیل اور بحیرہ احمر میں تجارتی جہازوں کو بھی بارہا نشانہ بنایا ہے، جس سے بین الاقوامی بحری تجارتی راستے متاثر ہوئے ہیں۔ تاہم، اب تک فائر کیے گئے بیشتر ڈرون اور میزائل راستے میں ہی تباہ کر دیے گئے یا ہدف تک پہنچنے سے پہلے گر چکے ہیں۔