پی آئی اے کی نجکاری: چار سرمایہ کار پری کوالیفائی، روزویلٹ ہوٹل کے لین دین کی منظوری

اسلام آباد: نجکاری کمیشن بورڈ نے پاکستان انٹرنیشنل ایئرلائنز (PIA) کے لیے چار ممکنہ سرمایہ کاروں کو پری کوالیفائی کر لیا، جبکہ کابینہ کمیٹی برائے نجکاری نے نیویارک میں واقع روزویلٹ ہوٹل کے لین دین کے ڈھانچے کی منظوری دے دی ہے۔

وزارت نجکاری کی جانب سے جاری اعلامیے میں بتایا گیا کہ حکومتی نجکاری ایجنڈے میں اہم پیش رفت ہوئی ہے، جس کے تحت نجکاری کمیشن بورڈ اور کابینہ کمیٹی برائے نجکاری (CCoP) نے دو کلیدی فیصلے کیے جو اسٹریٹجک لین دین کی جانب جاری پیش رفت کا حصہ ہیں۔

نجکاری کمیشن کے 237ویں اجلاس کی صدارت وزیراعظم کے مشیر برائے نجکاری و چیئرمین کمیشن محمد علی نے کی، جس میں پاکستان انٹرنیشنل ایئرلائنز کی نجکاری کے لیے دلچسپی رکھنے والی پانچ پارٹیوں کی دستاویزات کا تفصیلی جائزہ لیا گیا۔

جائزے کے بعد درج ذیل چار سرمایہ کاروں کو پری کوالیفائی قرار دیا گیا:

1. کنسورشیم: لکی سیمنٹ لمیٹڈ، حب پاور ہولڈنگز لمیٹڈ، کوہاٹ سیمنٹ کمپنی لمیٹڈ، اور میٹرو وینچرز (پرائیویٹ) لمیٹڈ

2. کنسورشیم: عارف حبیب کارپوریشن لمیٹڈ، فاطمہ فرٹیلائزر کمپنی لمیٹڈ، سٹی اسکولز (پرائیویٹ) لمیٹڈ، اور لیک سٹی ہولڈنگز (پرائیویٹ) لمیٹڈ

3. فوجی فرٹیلائزر کمپنی لمیٹڈ

4. ایئر بلیو (پرائیویٹ) لمیٹڈ

ان پری کوالیفائیڈ اداروں کو اب پی آئی اے کی خریداری سے متعلق تفصیلی جانچ پڑتال (Due Diligence) کے اگلے مرحلے میں شریک ہونے کی اجازت دی گئی ہے، جو نجکاری کے شفاف اور مسابقتی عمل کا اہم جزو ہے۔

مزید برآں، کابینہ کمیٹی برائے نجکاری نے روزویلٹ ہوٹل کے ممکنہ لین دین کے ڈھانچے کو بھی باقاعدہ منظوری دے دی، جسے مستقبل قریب میں حتمی شکل دی جائے گی۔