دادا کا پوتوں کو زنجیروں سے باندھنے کا واقعہ ، مرکزی ملزم گرفتار

تفصیلات کے مطابق ضلع مظفر گڑھ کے تھانہ دائرہ دیں پناہ کے علاقہ میں ایک شخص اللہ بخش اپنے  نے دو کمسن پوتوں اختر عباس اور منور عبا س کو زنجیروں میں جکڑ نے کیلئے  ویلڈر محمد بخش کو بلایا جس نے کم سن بچوں کو زنجیروں میں ویلڈ کر دیا ،اس وقوعہ کی ویڈیو سوشل میڈیا پر وائرل ہوئی تو ریجنل پولیس آفیسر ڈی آئی جی محمد فیصل رانا  نے سخت نوٹس لیا  اور ڈی پی او مظفر گڑھ کو مقدمہ درج کر کے ملزمان کی فوری گرفتاری کا حکم دیا ۔

آر پی او فیصل رانا  خود تھانہ دائرہ دیں پناہ پہنچے،جہاں پر انہیں بتایا گیا کہ وقوعہ کے مرکزی ملزم اللہ بخش کو گرفتار کر کے زنجیروں میں جکڑے بچوں کو بازیاب کروا لیا گیا ہے ،وقوعہ کامقدمہ ملزم اللہ بخش اور ویلڈرمحمد بخش کے خلاف درج کر لیا گیا ۔

آر پی او کو بتایا گیا کہ زنجیروں میں جکڑ کر ویلڈ کئے گئے بچوں کا والد لاہور میں مزدوری کرتا ہے ،آر پی او فیصل رانا نے بروقت کارروائی کرکے بچوں کی بازیابی  اور مرکزی ملزم کی گرفتاری پر پولیس کو شاباش دیتے ہوئے مقدمہ کے دوسرے ملزم ویلڈر محمد بخش کی گرفتاری کے لئے پولیس کو 48 گھنٹوں کی ڈیڈ لائن دے دی ۔

آر پی او کا کہنا تھا کہ کم سن بچوں کا زنجیروں میں جکڑ کر ویلڈ کیا جانا ایک انتہائی افسوسناک وقوعہ ہے ،اس وقوعہ کی حساسیت اس حوالے سے بھی بڑھ گئی ہے کہ ملزم کمسن بچوں کا داداہے ۔آر پی او نے کہا کہ ڈی پی او مظفر گڑھ اس مقدمہ کی تفتیش کی خود نگرانی کریں گے۔