ضم شدہ اضلاع کیلئے تعلیمی کوٹہ بحال، وزیراعظم کا اہم اعلان

وزیراعظم شہباز شریف نے خیبرپختونخوا کے ضم شدہ اضلاع کے طلبہ کے لیے میڈیکل کالجز اور انجینئرنگ یونیورسٹیوں میں تعلیمی کوٹہ بحال کرنے کا اعلان کیا ہے۔
یہ اعلان اُس وقت سامنے آیا جب جمعیت علمائے اسلام (ف) کے سربراہ مولانا فضل الرحمان کی قیادت میں قبائلی مشران کا ایک وفد وزیراعظم ہاؤس پہنچا، جہاں ان کا پرتپاک خیرمقدم کیا گیا۔

ملاقات کے دوران جرگے میں ضم شدہ اضلاع کی امن و امان کی صورتحال، ترقیاتی اقدامات اور مقامی مسائل پر تفصیلی تبادلہ خیال ہوا۔ وزیراعظم نے وفد کو یقین دہانی کروائی کہ حکومت ان علاقوں کی تعلیمی و اقتصادی بہتری کو اپنی ترجیحات میں شامل رکھے ہوئے ہے۔

قبائلی نمائندوں نے تعلیمی کوٹے کی بحالی کے فیصلے کو سراہتے ہوئے اسے قبائل کے پرانے مطالبے کی تکمیل قرار دیا۔

وزیراعظم شہباز شریف نے اس موقع پر کہا کہ قبائلی عوام پاکستان کی تاریخ، ثقافت اور سلامتی کی پہچان ہیں، جنہوں نے ہمیشہ وطن کے لیے قربانیاں دی ہیں۔ ان کا کہنا تھا کہ ضم شدہ اضلاع میں امن، تعلیم، صحت اور روزگار کے مواقع فراہم کرنا وفاقی حکومت کی اولین ترجیح ہے۔

انہوں نے مزید بتایا کہ موجودہ مالی سال کے ترقیاتی بجٹ میں فاٹا یونیورسٹی اور پولیس نظام کی بہتری کے لیے خطیر رقم مختص کی گئی ہے، تاکہ نوجوانوں کو روشن مستقبل میسر آ سکے۔