انجینئر الطاف حسین نے نیشنل گرڈ کمپنی آف پاکستان کے منیجنگ ڈائریکٹر کا عہدہ سنبھال لیا

وہب ڈیسک: انجینئر الطاف حسین نے نیشنل گرڈ کمپنی آف پاکستان کے منیجنگ ڈائریکٹر کا عہدہ سنبھال لیا ہے۔

تفصیلات کے مطابق یہ تقرری ایک ایسے وقت میں ہوئی ہے جب وفاقی حکومت کے تنظیم نو کے پروگرام کے تحت پاور سیکٹر میں بڑے پیمانے پر اصلاحات کی جا رہی ہیں جن کا مقصد شفافیت، کارکردگی اور توانائی کے شعبے کو جدید خطوط پر استوار کرنا ہے۔

انجینئر الطاف حسین نے بطور منیجنگ ڈائریکٹر این جی سی اپنی ذمہ داریاں سنبھال لی ہیں۔ وہ بجلی کی ترسیل اور تقسیم کے شعبے میں تین دہائیوں سے زائد عرصے کا بین الاقوامی تجربہ رکھتے ہیں۔ انہوں نے اپنے کیریئر کا آغاز 1987 میں واپڈا سے کیا اور بعد ازاں کینیڈا کے پاور سیکٹر میں ستائیس سال خدمات انجام دیں۔

عہدہ سنبھالتے ہی منیجنگ ڈائریکٹر انجینئر الطاف حسین نے ڈپٹی منیجنگ ڈائریکٹرز، جنرل منیجرز اور سی سوٹ (C-Suit) افسران کے اجلاس سے آن لائن خطاب کیا جس میں ان کا کہنا تھا کہ این جی سی کو ایک جدید اور ترقی پسند ادارے میں تبدیل کیا جائے گا۔ انہوں نے ٹیم ورک، جدید ٹیکنالوجی کے استعمال، مؤثر رابطے اور ادارے میں صلاحیتوں کے بہتر استعمال پر زور دیا۔

انجینئر الطاف حسین نے امید ظاہر کی کہ این جی سی ملک کی بڑھتی ہوئی بجلی کی طلب کو پورا کرنے اور ملکی معاشی ترقی میں معاون ثابت ہوں گی اور مقررہ اہداف بروقت حاصل کریں گی۔