بابوسر ناران شاہراہ سیلاب کے ایک ہفتے بعد بحال، سیاحوں کی تلاش جاری

ترجمان گلگت بلتستان حکومت فیض اللہ فراق نے بتایا ہے کہ سیلاب سے متاثر ہونے والی بابوسر ناران شاہراہ کو ایک ہفتے بعد بحال کر دیا گیا ہے۔

ترجمان کے مطابق شاہراہ کو فی الحال یکطرفہ ٹریفک کے لیے کھولا گیا ہے۔ انہوں نے مسافروں سے اپیل کی ہے کہ احتیاط سے سفر کریں اور غیر ضروری نقل و حرکت سے گریز کریں۔

فیض اللہ فراق نے مزید بتایا کہ بابوسر کے علاقے میں سرچ آپریشن میں تیزی لائی گئی ہے۔ شاہراہ پر پیش آنے والے حادثے میں تقریباً 15 سیاح سیلابی ریلے میں بہہ گئے تھے، جن میں ایک نجی ٹی وی چینل کی خاتون اینکر اور ان کے اہل خانہ بھی شامل ہیں۔ لاپتا افراد کی تلاش بدستور جاری ہے۔

ترجمان کے مطابق چلاس کے تھک نالے میں آنے والے سیلاب کے باعث 10 افراد جاں بحق ہو گئے تھے۔ وزیراعلیٰ گلگت بلتستان نے متاثرہ خاندانوں سے اظہار افسوس کرتے ہوئے ریسکیو کارروائیوں کو مزید تیز کرنے کی ہدایت جاری کی ہے۔

یاد رہے کہ تقریباً ایک ہفتہ قبل گلگت بلتستان کے ضلع دیامر میں شدید بارشوں کے بعد اچانک سیلابی صورتحال پیدا ہوئی تھی، جس کے نتیجے میں درجنوں افراد لاپتا ہو گئے اور 10 افراد جان کی بازی ہار گئے تھے۔