یومِ آزادی پر تحفہ: پاکستانی نوجوانوں کی قازقستان میں تاریخی فتح

پاکستان کے ابھرتے ہوئے گالفرز مہاد خان اور سارہ امین خان نے قازقستان جونیئر اوپن گالف چیمپئن شپ 2025 میں بوائز اور گرلز کیٹیگری کے ٹائٹلز اپنے نام کر لیے۔

ذرائع کے مطابق، زیلجاو گالف کلب، الماتی میں منعقدہ اس بین الاقوامی ٹورنامنٹ میں پاکستانی نوجوانوں نے شاندار اور یادگار کھیل کا مظاہرہ کیا۔ مہاد خان نے بوائز کیٹیگری میں غیر معمولی کارکردگی دکھاتے ہوئے دیگر تمام کھلاڑیوں کو پیچھے چھوڑ دیا، جب کہ اسی کیٹیگری میں پاکستان ہی کے زید عمر ارشد نے رنر اپ پوزیشن حاصل کی۔

گرلز کیٹیگری میں سارہ امین خان نے مہارت اور اعتماد کے ساتھ میدان مارا اور وننگ ٹرافی اپنے نام کی۔

مزید برآں، مہاد خان نے طویل ترین ڈرائیو کا اعزاز بھی حاصل کیا، جبکہ زید عمر ارشد نے 'پن کے قریب ترین شاٹ' کھیل کر اپنی مہارت کا لوہا منوایا۔

اس شاندار کارکردگی پر پاکستان گالف فیڈریشن کے صدر اور سیکریٹری نے کھلاڑیوں کو مبارکباد دیتے ہوئے اسے یومِ آزادی (14 اگست) پر قوم کے لیے ایک خوبصورت تحفہ قرار دیا۔