محبت پر یقین رکھتی ہوں، دوسری شادی کا دروازہ بند نہیں کیا: ملائکہ اروڑا

بالی ووڈ کی معروف اداکارہ اور ماڈل ملائکہ اروڑا نے 51 سال کی عمر میں دوسری شادی کی خواہش کا اظہار کر کے مداحوں کو حیران کر دیا ہے۔

حال ہی میں دیے گئے ایک انٹرویو میں ملائکہ اروڑا نے اپنی ذاتی زندگی سے متعلق کھل کر بات کی۔ ایک سوال کے جواب میں ان کا کہنا تھا کہ "جب میری ارباز خان سے شادی ہوئی تو میری عمر کم تھی، اُس وقت بہت کچھ سمجھنے کا موقع نہیں ملا۔"

ملائکہ نے نوجوان لڑکیوں کو شادی میں جلد بازی نہ کرنے کا مشورہ دیتے ہوئے کہا "زندگی کے سفر کو اچھی طرح سمجھ لینے کے بعد شادی کا فیصلہ لینا زیادہ بہتر ہوتا ہے۔"

جب ان سے پوچھا گیا کہ کیا وہ اب دوبارہ شادی کرنا چاہیں گی؟
تو انہوں نے جواب دیا "میں محبت پر یقین رکھتی ہوں اور میں نے کبھی دوسری شادی سے متعلق ’نہ‘ نہیں کہا۔"

ان کے اس بیان کے بعد سوشل میڈیا پر ملائکہ کی ممکنہ دوسری شادی سے متعلق چہ مگوئیاں تیزی سے پھیلنے لگیں۔

ملائکہ کی شادی اور رشتوں کی جھلک:

یاد رہے کہ ملائکہ اروڑا نے 1998 میں اداکار ارباز خان سے شادی کی تھی، اور دونوں نے 18 سال ساتھ گزارنے کے بعد 2017 میں علیحدگی اختیار کر لی۔

ارباز خان سے طلاق کے بعد ملائکہ 2018 میں اداکار ارجن کپور کے ساتھ تعلق میں رہیں، تاہم دونوں نے 2023 میں راہیں جدا کر لیں۔